Fù a fata di a mossa chì fece nasce à Canta u
Populu Corsu. Ricurdendusi di’ssu gruppu
miticu attore principale di u riacquistu di
l’annate 70, cumu si pudia crede tandu ch’ellu si
lagneria tantu oghje di a so sorte nantu à a so
terra, stu populu? Canta u Populu Corsu hè sempre
statu una forza, una fede è una prisenza
tremenda.
À u principiu eranu da 20 à 30 è po’esse ancu di
più, donne è omi, vechji, giovani è zitelli ogn’unu
vistutu à so manera; quand’elli cullavanu nantu à
a scena eranu stonde duve l’emuzione culminava
è u populu arrittu era cum’è in cummunione.
Strumenti ci n’era pocu, ci vole à dì chì e voci
ben’ accurdate bastavanu à cummunicà fervore,
passione è curagiu à tutt’un populu. U populu
cantava cù u populu, è u populu, parlava à u populu :
trà publicu è cantadori, fruntiere, ùn ci n’era.
Canta era una squadra vucale senza paracone, ùn
ci hè chè da sente per esempiu A Lettera di u
mulatteru à u Corsu(1) per esse cunvintu di u fervore
ch’ellu facia nasce.
Era cum’è una magia, chì a memoria scurdata
rinascia…
Ma Canta hà fattu più chè cusì : Canta hà suminatu
in una piana ch’omu cridia sterile, è a
sumente hè sbucciata. Una ciucciata hè nata è issa
leva ùn si firmerà più; ùn ci hè chè da mettesi à
cuntalli i gruppi culturali, oghje.
Ma per rivenene à Canta, un ghjornu a magia si
piantò. È ùn si sentì più parlà di Canta durante
parechj’anni. A matrice, a mamma, di i cantadori
di u riacquistu s’era ammutulita, è per i militanti
ùn firmava più chè nustalgia…
Ma e cose belle ùn ponu more cusì à e prime, è
un’alba nova si pisò, sempre cun fede, sempre
cun forza, sempre à pugnu tesu, turnava à cantà u
populu corsu, cù anziani è nuvelli cantadori è
strumenti nuvelli. Canta hè una famiglia, duve
chì, ancu quelli partuti, tornanu à l’occasione per
addunisce e so magnifiche voci. Da Canta u
Populu Corsu, ùn si pò parte, ùn si pò chè vultacci.
Canta : un mitu, una memoria, una magia, un’anima,
una passione, a cummunione d’un populu
liberu nantu à a so terra… eri… oghje… è
dumane.
Antone FILIPPI
1. Parulle di Ghjuvan Paulu Poletti.
