L’affare Séguéla hà avutu un mèritu : discità l’opinione
pùblica nant’à u periculu di vede u nostru liturale
sfracellatu da e case di i ricconi.
Puntu negativu : i sguardi si portanu tutti nant’à
Bunifaziu, è micca in altrò…
Dapoi chì di u Tribunale Amministrativu di Bastia hà
datu a so decisione di lascià custruisce e villà di Séguéla,
Sulitzer è Delsol in Cala Longa, pare ch’ella si sia discitata
l’opinione pùblica nant’à a quistione di u liturale.
Durante qualchì settimana, a cumuna di Bunifaziu hà
attiratu tutti i sguardi. Micca per via di a bellezza di a so
citatella, ma piuttostu per quella di u so PLU, fattu à cicchiciamberra
da l’anziana municipalità chì favurizeghja
u « mitage » è chì hà dettu di sì à a custruzzione di a
zona di Cala Longa.
Ci vole à dì chì sei mesi fà, for di i Bunifazinchi è di i
certi militanti eculògichi, pochi s’eranu interessati à u
PLU di a cità bunifazinca… Avà Séguéla hè diventatu u
nimicu publicu numeru unu è ognunu cunnosce l’esistenza
di i sgiò Sulitzer è Delsol.
Hè dunque bastata a decisione di u TA di Bastia pè
infiarà u dibattitu nant’à a custruttibilità di e coste corse.
Una petizione à l’iniziativa di u Cullettivu pè a Lege
Liturale (http://cll-corse.org) hà arresgistratu in qualchì
settimana circa 16.000 firme… Ùn s’era mai vistu à u
livellu di a Corsica.
Purtantu, ùn ci hè ch’è da seguità a strada chì và da
Sulinzara à Bunifaziu pè rendesi contu ch’è in ogni locu
a lege liturale ùn hè rispettata. Quindi è culandi fiuriscenu
l’àrgani è giranu e betonneuses…
L’associu U Levante hà publicatu un listinu di i lochi
oghje vèrgini induve esistenu prugetti di custruzzioni.
Surpresa, ùn ci hè micca ch’è u Meziornu di a Corsica
induve a pressione di u bettone hè forte : Siscu, Furiani,
Borgu, Olmeta di Tuda, Poghju Mezana, Aleria, Coti
Chjavari, Purtichju… Tanti lochi incustruttibili ch’aspettanu
d’esse scempiati per sempre. Ma à troppu puntà «
l’esempiu » di Bunifaziu, ùn risichemu micca di lascià
fà peghju in altrò ?
Ùn ci hè dunque micca ch’è villà di sgiò, stelle (più o
menu has been…) di u show biz chì volenu u so palazzubunker
cù videosurveglianza in bor’di mare. Casacce
d’un gustu dubbitosu chì sdìcenu in u paisagiu, ne nasce
decine è decine ogni annu, ch’ella venga da Corsi o da
fresteri, nanzu è dopu à a banda di i centu metri. Basta di
spassighjassi in Castagniccia o in Alta Rocca : case
goffe è pretensiunute ci n’hè in ogni paese. Apulluzione
visuale esiste, u paisagiu hè imbruttatu ma per quessa, a
lege ùn hà risposta à dà.
In tantu, u 5 di ghjunghju scorsu, durante una riunione cù
l’associ di difesa di l’ambiente, u prefettu di Corsica
dichjarava ch’ellu ci vulia à truvà « cumprumessi »
piuttostu ch’è d’appiegà di manera rigurosa a lege. Ùn si
po esse più chjaru. Si mancu i prefetti sò primurosi di fà
rispettà a lege, almenu sapemu induv’è no andemu…
Semu prevenuti, u peghju hè siguramente davant’à noi !
Petru Paulu de CASABIANCA
