Dopu à « Tchernobyl, la Corse sacrifiée », i ghjurnalisti Eliane Parigi è Jean-Charles Chatard venenu di presentà un documentariu novu, chjamatu « Mortel Amiante ». Trattendu di l’effetti proprii à u tigliu ambientale in Cismonte, hè statu pruduttu da u canale di televisiò France 3 Corse/Via Stella è l’Agenza di stampa Corse TV. Per voi carissimi lettori, A Nazione hà vulsutu sape ne di più, scuntrendu unu di l’autori di sta inchiesta esclusiva.



Eliane Parigi, quale sò e ragiò chì v’anu datu u laziu à voi ghjurnalista d’interessà vi à u sughjettu di u tigliu in Corsica è di creà ne un documentariu ?

I corsi cunnoscenu bè u tigliu cù i so guai murtali, pè via di i travagliatori di Canari... Vole si dì e vittime d’issa industria senza muralità, chì fubbe una vera disgrazia per sta povera ghjente chì hà persu a vita pè stantassi u so pane ! Da u latu culturale, à i tempi più antichi, i nostri antennati cunniscianu dinù u tigliu imbuglighjatu à a terra pè fà e pignatte ; per esempiu in Castagniccia. Vogliu dì ch’eiu ùn avia nunda à imparà li annantu à l’usu di u tigliu... Ma vulia porghje li una riflessione oghjinca à prò di u tigliu naturale, sta petra particulare ch’omu si trova sempre ind’è 136 paesi cismuntichi. U modu documentariu chè nò avimu sceltu cù Jean-Charles Chatard ghjè quellu chì permette di piglià una andatura più pulitica. Vogliu dì un sguardu annantu à a strada scelta da a sucietà corsa, vistu chì assai grandi prughjetti di mudernisazione toccanu lochi pieni di tigliu. Cumu scioglie a questione di a salute quasi opposta à quella di u sviluppu ?


Quantu hà duratu l’inchiesta è cumu s’hè strutturata ?

L’inchiesta principiò un annu fà. L’idea era di circà à capisce è mustrà i parè di i pulitichi, l’impresarii, l’amministrativi, l’associi di difesa di l’ambiente, è perchè micca pruvà à accuncià li !


À partesi di quali elementi stu travagliu di terrenu ghjè statu messu in ballu ?

Avimu prima arricoltu assai documentazione, da quì è d’altrò, scentifica, amministrativa, tennica, medicale, mà dinù di a legge è a ghjustizia... Avimu verificatu in ogni locu, scuntratu assai testimonii d’ogni manera, sinu à l’America pè certi. Sbulicatu e memorie spente o e parolle scherse.

Chì u tigliu rende mutu !


Ch’avite scuntratu cume difficultà ?

À puntu : i muti ! U più difficiule fù di scunvice certi rispunsevuli prufeziunali, pulitichi o amministrativi di parlà ci. Forse chì certe volte ci hè una lea trà elli. Ma u peghju ghjè chì nisunu impresariu ùn vulia lascià filmà i so travaglii, nisuna amministrazione ùn vulia dà e so misure –ch’ella sia a CRAM o a DDASS– è nisunu elettu per e spiecazione... È quandu affaccavamu cù a camerà, nasciva u fughji fughji ! Dunque ci tene à core di ringrazià tutti quelli chì sò ind’è u filmu ; ancu s’elli pensanu forse chè l’avimu tagliati à l’accorta !


Ci hè un stalvatoghju particulare chì vi vene in capu è di u quale vulete parlà ?

E prime fiure sò state fatte in Bastia, à l’Annonciade, vicinu à a scola Desanti, ind’elli ghjucavanu i zitelli : à mezu tigliu ! Un mese dopu simu vultati : i ghjochi eranu tramutati più luntanu, a terra spianata, u passeghju cupertu di cimentu... Eramu felici di pensà chì forse a camerà hà ghjuvatu à qualcosa !


À chì cunclusione site ghjunti ?

Ch’ellu manca l’infurmazione linda annantu à i risichi pè a salute, è s’aspetta sempre u cartulare di i cancheri è l’inchiesta d’epidemiologia : di prumette è di mancà, ogni ministru a sà fà.


In rapportu à quelli risultati, pudite dacci u vostru parè annantu à a situazione oghjinca di u tigliu in Cismonte ?

Ghjè un imbrogliu maiò in lea à u suciale, l’ecunumia è a salute. Vole si dì chì a decisione tocca à i pulitichi !


Chì paragone si puderia fà cù u vostru primu prughjettu d’investigazioni, cuncernendu u scumpientu di Tchernobyl in Corsica ?

U primu, per noi : a ricerca di a verità è sparghje l’infurmazione. U secondu : quandu si tocca à l’ecunumia, à i soldi, ci hè poca primura di a salute di a ghjente.


Dopu à a so diffusione publica, cosa sperate, oghje, di stu secondu documentariu ?

Discità e cuscenze di i rispunsevuli pulitichi : qualchì passu praticu pè prutegge a ghjente, basta à vulè.


Una parolla à u livellu di a collaburazione trà l’Agenza di stampa Corse TV è u canale di televisiò France 3 Corse/Via Stella ?

Ghjè a seconda volta è l’affare si passò probiu bè cù i nostri amichi di France 3 Corse. Senza scurdassi ne di Sampiero Sanguinetti, chì stu filmu fubbe unu di l’ultimi ch’ellu hà firmatu in Aiacciu. Ch’ellu ne sia ringraziatu. Cù tutti quelli chì ci anu aiutati à purtà l’infurmazione più luntanu

Roland Frias