Antone Maria Graziani hè prufessore
di l’università à l’IUFM di a Corsica.
Hà scrittu parechji articuli è libri
nant’à a storia di l’isula è i so
persunaggi, cum’è Sampieru o u rè
Tiadoru. Oghje ghjornu, Antone Maria
Graziani hè u principale specialistu di
Pasquale Paoli. Hà scrittu una
biografia di u babbu di a patria
(edizione Tallandier, 2002).
Risponde à e quistione di A Nazione.
Chì vi vene in core cù sta cumemurazione
oghjinca ?
Quand’omu vede ch’ellu si cunfonde ind’u librettu
d’accumpagnamentu di e cumemurazioni
naziunali tirania è desputismu si pò avvicinà stu
gèneru da dichjarazioni digià intese : “Paoli ùn hè
mortu in Ponte Novu”. Ma quale hè chì hà dettu
chì Paoli seria mortu in Ponte Novu ? E quale hè
chì hà dettu chì Paoli era un tiranu ? Imprestà à
altri dichjarazioni ch’elli ùn hanu mai fattu permette
a u calunniatore di mette a màschera à i so
sìntimi stessi nantu à u ghjeneralatu o a
Custituzione di u 1755. D’infatti si sente daretu à
tuttu què a nustalgia di u biscentenariu di a
Rivuluzione francese. U prublema hè chì nimu hà
laziu d’appughjà nantu à a tocca “bis”.
Chì a
cascata di u muru di Berlinu aghja cagiunatu una
impurtante mutazione ind’a lettura di l’evenimenti
di a Rivuluzione francese, mutazione chì affacca
ancu ind’i scritti di stòrichi favore à u
periodu di u 1793. Un si pò nigà chì Paoli fubbe
particiante di u 1793, fendu voti per una lìbera
unione cù a Francia, ma hè certa dinò chì l’omi di
u 1793 ùn vulianu più à Paoli, per certi, nè di a
Corsica, per altri. E chì Paoli tandu hà sceltu
l’Inguilterra : ùn scrisse ind’u 1795 è ancu ind’u
1796 “a nostra marina” parlendu di a marina
inglese ? Staccà una fraza da un insèmule hè
fàciule, entre ind’a cumplessità d’un persunagiu
di punta à l’obbligazione di fà scelte in circunstanze
particulari, hè bella più diffìciule.
Un altru stòricu assicura ind’una intervista per
“Nice-Matin” chì Pasquale Paoli ùn susteneria
oghje a viulenza pulìtica. Chì ne pensate ?
A viulenza ùn hà mai fattu a paura à Paoli, nè
menu à l’altri revuluziunarii di u XVIIIu sèculu. In
quantu à sapè ciò ch’elli penserianu i detti revuluziunarii
di ciò chì intravene oghje hè una altra
quistione.
Paoli cuntinuvatore di Tiadoru...
Ci hè un bellu pezzu chì in Francia hà omu lasciatu
l’edea di Barruel chì fecia di a Rivuluzione
francese u risultatu d’un cumpulottu massònicu.
Mancu per e Rivuluzioni di Corsica ùn ci hè mai
statu cumpulottu massònicu. Ind’a vita di Paoli, a
massuneria conta per pocu nanzu à u so sughjornu
in Inguilterra.
Aprima mossa di a Fra-Massuneria in l’inturnianza
di Paoli, inaudita à ghjorni d’oghje è ch’o
publicheghju ind’u terzu vulume di a currispudenza,
figura a lèttera d’un bastiacciu chì assicura
chì Paoli arrangia l’affari di i framassoni
bastiacci, i so prutetti. E basta...
Chi ne pensate di a “lèttera à Paoli” da
Fredericu publicata ùn ci hè tantu ?
Hè strasordinaria ciò chì l’odiu per Paoli è per
una certa Corsica pò fà realizà... Anni fà, ci avianu
digià fattu u colpu cù a publicazione di un libbellu
di Buonarotti, un documentu bellu cunnisciutu,
digià publicatu è editatu sta volta... senza
note ! Vale à dì nunda, da un puntu di vista stòricu,
ind’u mentre chì travagli di Buonarotti ci ne
hè à battellate in Italia. Dopu ci hè un sociòlugu
chì publicheghja un travagliu nantu à u razzismu
à favore di i Corsi, cun cume basa un seria d’artìculi
pigliati in “Nice-Matin”. In ss’artìculi “people”
chì si sfòcanu d’estate, à l’ùltima pàgina : chì
pensa Guy Bedos, Karl Zero, Verònica Genest di
a Corsica. Una publicazione anedòttica. Ma èccuci
chì u listessu sociòlugu dà a lezziò à i stòrichi.
E ch’ellu publicheghja una “lèttera à Paoli”, altru
testu bellu bè cunnisciutu, attribuitu in falsu à u
“nipote” o à u “figliolu” di Tiadoru, è chì l’autore
di sse lèttere hè un andacianu pulunese, diventatu
amicu di Tiadoru in fin di vita, chjamatu
Fredericcu Vigliawiski. Un testu chì hà un certu
valore, s’omu u rimette ind’a so inturnianza inglese.
Ma, di sicuru, un travagliu stòricu serà troppu
dilicatu per un stòricu nascente...
“Aria di Nàpuli” o “aria di Londra” ?
Hè què tuttu u prublema di a furmazione d’un
indivìduvu. Quande no averemu dettu chì un indivìduvu
cuntinuva à furmassi à longu di a so vita è
chì Pasquale Paoli hà apprufunditu u so pensamentu
in Inguilterra, chì averemu dettu di più chè
una evidenza ? Hà senza dùbbitu di più tempu per
scrive ciò ch’ellu pensa, scontra dinò ghjente à
l’altura... Ma u ferà quessa cambià da veru u so
pensamentu è puderà quessa falli mutà e so aspirazioni
? Ci hè da dubbitanne : frà i so più stretti
ci hè Edmund Burke, chì serà u paragone di u
contra rivuluziunariu è James Boswell chì per ciò
chì tocca à a Rivuluzione francese hè più vicinu
da Burke chè da u so amicu Paoli, è quesa ùn
impedisce à Paoli di sceglie di participà à a
Rivuluzione francese.
Paoli, autunumia, separatismu ?
Paoli hè prima u cuntinuvatore di e Rivuluzioni di
Corsica. Ind’u 1755, in sèguita à Ghjuvan Petru
Gaffori, hè chjaramente u riprisantante d’una ìsula
indipendente, cun un veru sensu di u Statu. Hè ssu
periudu chì u face cunnosce : u 90% di ritratti di
Paoli sò da u 1764 à u 1769 ; hè tandu ch’ellu interessa
l’Auropa è i Stati Uniti, micca ind’u 1790...
A Rivuluzione francese, à a quale ellu si dà ind’u
1790, ùn hè chè un anellu di a catena di e
Rivuluzioni. Basta cù l’idea di l’eccessione francese
: a Repubblica ùn hè stata “inventata” ex
nihilo ind’u 1792 in Pariggi ! Piglia imprèstiti à
tutti quelli chì li sò venuti nanzu, cum’ellu u face
vede u nùmeru di e decisioni è di i testi di u 1789
(a Dichjarazione di i Diritti hè largamente inspirata
da e Dichjarazioni americane ; u dipartimentu
ind’u so aspettu geumètricu hè pigliatu in prestu à
u ritagliu di e cunfini di l’Appalachi, ecc.). Ma in
Francia, a Rivuluzione americana, à spessu sottu
stimata, hè puchìssimu insignata è a Rivuluzione
inglese, chì hè andata nanzu à traminduie, è chì hà
per un bellu pezzu, ghjuvatu di fundamentu intellettuale
à i “Lumi”, hè righjittata ind’i libri sculari
ind’e lezziò nantu à l’anzianu regime. Ind’u
mentre chì Paoli cume John Adams ponu scrive à
a vigiglia di a Rivuluzione ch’elli stìmanu a custituzione
inglese superiore à a custituzione americana...
è à a custituzione francese prumessa à un
bellìssimu avvene (prumulgata ind’u 1791, caderà
in dirotta à favore à a custituzione di l’Annu II chì
hà cume carattèrisca principale d’ùn esse mai
stata messa in òpera !).
Paoli, chì hà pensatu ind’u 1790-1793 ottene una
impurtante autunumia per a Corsica ind’u quadru
francese, è po senza più successu ind’u 1794-
1795 ind’u quadru inglese, hà fiascatu à fà piglià
in contu da ssi Stati a dimensione particulare di a
so ìsula. Ma averà pussutu, ellu, cù e tradizioni
monàrchiche o eredate da a munarchia ottene
d’esse intesu ? Si ne pò dubbità. A Rivuluzione
francese, cum’ellu l’hà benìssimu nutata Alexis
de Tocqueville, piglia in prestu da a munarchia, è
ùn capiscu bè ciò chì permette di vede ind’a festa
di a Federazione di u 14 di lugliu 1790 une manifestazione
d’una “larga decentralisazione” chì
averia pussutu offre à Paoli “nove vie”...
Cumu avvicinassi da Paoli secondu voi ?
Avvicinassi pigliendu in contu tutte e parti di a
vita di Paoli : u cuntinuvatore d’una rivuluzione
principiata da altri – è ci sò parechji Corsi, si ne
scorda omu troppu à spessu, chì hanu lasciatu
corre u so sangue per quessa – ghjè ciò chì aghju
chjamatu “ u figliolu di u generale” ind’a sposta ;
u generale di a nazione, ingagiatu per è cun u so
pòpulu ; l’omu di i Lumi, infine, particiante d’una
indipendenza o d’una larga autunumia ind’un
unione largamente accunsentuta...
