In lu so’ ammirevule « Bréviaire méditerranéen
» Pedrag Matvejevitch, à prupositu di i
Siciliani, cita un passu di u bellu libru di
Dominique Fernandez « Mer Méditerranée » : « i
Siciliani fùbbenu Grechi, Cartaginesi, Rumani,
Bisantini, Arabi, Nurmani, Spagnoli, Napulitani,
Taliani. Ma ùn sò mai stàti Siciliani è sippuru, face
tantu tempu, ch’elli anu cessatu d’essene ! U
drama ghjè custì, d’appartene à tropp’epuche è
razze differente, ùn sànu qual’elli sò ».
Si putèria dì listessa cosa di ‘ss’altri isulani : i
Corsi. Serànu elli dinù figlioli di quellu Ulisse, u
quale, in la so’ ricerca di a so’ isula-patria, si dede
u nome di « Nisunu » ?
U so’ viaghju à traversu u Mediterraniu ùn serà chè
a metafora di sta ricerca d’identità ? È forse, derà a
risposta à a so’ angoscia esistenziale. Sò i provi
ch’ellu appetta, d’isula in isula, chì instituisce a so’
identità è a prughjettanu senza arretta versu u
futuru. Una identità inchieta chì s’apprufundisce
instancabilmente è si persegue à l’internu di l’isula,
trà mezu à a diversità di i so’ paisaghji è à u più
intimu di u so’ labirintu.
I grand’ scrittori cuntempuranii siciliani, Elio
Vittorini (« Conversazione in Sicilia »), Leonardo
Sciascia (« Pirandello e la Sicilia », « Gli Zii di
Sicilia »…), Vincenzo Consolo (« L’olivo e l’olivastro
»), mossi da un «desideru » d’identità, anu
circatu d’assupranà i « disastri » di a Storia è, à la
fine di a ricunquista di a so’ singularità isulana,
trovu l’omu universale, una Sicilia à parechje
dimensione da duve l’univeralità ferma singulare.
Ritenimu a lezzione ; tenimule cum’è guide.
Entrimu in cunversazione cun elli, crucemu e nostre
parulle plurale impastandu a memoria. À stu
cantu curale unimu e voci di li nostri genii proprii,
di Zenone d’Elea1 à Paul Valéry, voci chì ùn stancanu
di «dì ciò chì ci hè da dì » (I. Calvino) in
grecu, in latinu, in tuscanu, in francese è in li nostri
nobili parlati isulani. Discidemu i morti chì guardanu
e nostre case, maritemu l’alivu leghjittimu
cun l’oliastru, femu cantà u passatu à mille bocche
in lu nostru dulurosu presente. Inventemu u volcanu
di u quale simu orfani da sente a parulla di
focu d’Empedocle2, parulla matriciale è di redenzione.
Caminendu, ver’di sti stradelli muscosi è
lamaghjosi, di fureste in marine, modulemu e nostre
favule, ist’arme di u nostru imaginariu, da scioglie
u nodu di e nostre tragedie, dissegnemu ste
parabule barocche, chì, da un’ isula à i canti sutterrati
ci cunducenu à e sponde di l’universale.
Marie-Jean VINCIGUERRA, Traduzzione corsa di Petru Vachet-Natali
1. Zenone d’Elea : Filosofu grecu (485-430 pr. à
Ghj. Cr.) citadinu di l’Alalia greca (Aleria).
2. Empedocle : Filosofu grecu (Girgenti in Sicilia,
5u. seculu pr. à Ghj. Cr.).
