Qualessi sò i scopi di u vostru associu ?
Bastia 1905 hè natu durante l’estate 2005, quandu
simu falati in Liga 2. Vulemu fà ch’ellu fussi vivu
u nostru stadiu, cum’è nanzu. Stemu in a tribuna
este, detta Petrignani. Vendimu ghjacchette,
sciarpe, appiccicatoghji… Avemu dinù un situ
Internet1. Pruvemu dinù d’urganizà spiazzamenti.
Quistu annu, simu falati in Aiacciu ma avemu da
pruvà di parte dinù in Grenoble o Montpellier.
I vostri canti sò in corsu ?
Iè. Hè di primura per noi. Face parte di a “tifuseria”
bastiaccia. À l’iniziu, sò canti taliani chì avemu
adattatu in corsu. Nanzu, ci n’era pocu è micca. Hè
principiatu incù Testa Mora. Permette di dà un
atmosferu di più mediterraneu à u stadiu.
Site più passiunati da u Sporting o da u ballò di
modu generale ?
Per contu meiu, ghjè u Sporting ! Hè quistione
d’amore, di passione. Hè una manera di campà.
Avemu noi u sangue turchinu ! Ci sò chì facenu
sacrifizii per andà in Furiani. Ancu puru s’è certi
scontri di Liga 2 ùn ci facenu tantu sunnià.
St’ultimi anni, ci hè statu u rimusciu trà i dirigenti
è i sustenidori. Perchè ?
Ci sò stati prublemi trà i dirigenti è i sustenidori.
Ùn purtavanu più i valori di u populu turchinu. Hè
statu scioltu l’associu Testa Mora è avemu ripigliatu
u so impegnu, à prò di u SCB ma sempre
ind’a cuntestazione. Ad avà, ne simu sempre à sicutera.
Dumandemu sempre un urganigrama chì stabilisca
e respunsabilità d’ogni dirigente. Sin’à avà,
ùn avemu ricevutu nunda !
Qualesse sò e vostre rilazione incù i ghjucadori ?
Cun elli, hè propriu un antru affare. Cun tutti i
quelli chì tenenu cara a maglietta turchina, ci sintimu
assai bè. Pensu à i Corsi ma ancu à l’altri.
Eppò, quandu ci sò i risultati cum’è quist’ annu, ùn
ci pudemu micca lagnà.
Cumu hè ch’ellu ci hè di menu ghjente in
Furiani ?
Ùn simu micca noi respunsevuli di a deserzione di
u stadiu. Dipoi chì simu falati in Liga 2, ci hè poca
ghjente, moltu più incù a sciolta di Testa Mora. Per
contu nostru, ci demu di rimenu da ch’ellu volti u
populu turchinu per sustene a nostra squadra.
Ùn vi face più sunnià u Sporting ?
L’epupea di u 78, a cuppa di Francia di l’81… Tuttu
què, ghjè u passatu. Incù u Sporting, ùn si tratta di
sognu ma d’amore. Ci andemu perchè ci piace. Ùn
capiscu micca cumu un bastiacciu possa sustene un antra squadra ! Certi dinù, vanu à u stadiu à pattu è
cundizione ch’elli ci fussinu i risultati.
Chì ne pensate di l’affare Kébé ?
Per contu nostru ùn simu micca cuncernati. Sò i
media francesi chì n’anu fattu un affarone. Ùn
avemu micca capitu perchè parte da nunda. Hè un
secondu affare Chimbonda. Quandu si parla di
Bastia è di razzisimu, si campanu i media. Invece
Kébé hà dettu sprupositi. Per esempiu, hà dettu chì
era statu vittima di ghjasteme razziste, annu, in
Aiacciu. Avemu circatu è trovu chì tandu, ùn era
mancu nant’à u fogliu di u scontru. Ùn ghjucava
micca quella sera ! In quellu affare, simu noi e vittime,
i paganacci.
I soldi piglianu una piazza tremenda in u sportu.
Chì ne pensate di u « naming(2) » ?
Palesa a perdita di i valori. Seremu pronti à perde
tuttu per dui soldi ? A squadra di Le Mans hà da
chjama u stadiu MMA Arena ! U prugressu finanziariu
arrecatu da u naming permetterà i prugressi
spurtivi ? Per contu nostru, ùn ci pudemu micca
paragunà à e squadre alemane o inglese. S’elli a
facenu elli, pocu impreme per mè chì sò squadre
maiò ma ch’elli lascinu e piccule squadre in pace.
Eppuru, oghje ch’è oghje, senza soldi, ùn si pò più
riesce ?
Più ch’è di soldi, avemu bisognu di ghjucadori chì si
battinu ! Avemu bisognu dinù di dirigenti astuti,
maliziosi. Nanzu, c’era di più lesina… Per via di i
dirigenti, sò parechji anni chì ùn pudemu più ricrutà
ghjucadori. A sola via hè a furmazione. Sò i giovani
esciuti da u centru di furmazione chì anu permessu
di salvà u Sporting. Ancu s’è ùn puderemu micca
mette ondeci Corsi nant’à u terrenu, ci felicitemu di
a so vultata. In più di quessa, impersuneghjanu i
valori di u SCB. Cun elli, ci hè a rabbia è a passione
dinù. Elli sì chì sò accaniti !
Pensate, oghje chì hè oghje, ch’ellu l’averà i mezi
u SCB per turnà à scumbatte in Liga 1 ?
Spergu ! Chì si di nò, u risicu sarebbe chì u SCB
s’addebulisca pianu pianu in Liga 2. Quistu annu, si
battenu tutti i ghjucadori è facenu partite di quelle !
Per avà, ùn ci vole micca à mette li a pressione.
Feremu i conti in fine di stagione. Ma hè bella sicura
chì per noi, ùn sarebbe listessu affare. In L2, avemu
sopratuttu u derby è unepochi d’altri scontri. Invece
chì in L1, ogni partita t’hà un impurtenza tremenda.
1. www.bastia1905.com
2. U « naming » cunsiste à dà u nome d’un impresa à u
stadiu.
Interviste fatte da Sebastianu Quenot. Ringraziemu à
Antone Rombaldi è Jérôme Negroni chì ci anu aiutatu
à realizà stu cartulare.
