Jean-Claude Bouttier ghjè un buzzore miticu. Hè statu campione d’Auropa è numaru 2 ind’u mondu sanu. Oghje, hè cummentadore spurtivu nantu à Canal +. In issa intervista esclusiva, u buzzore francese risponde à e quistioni di A Nazione nant’à u cumbattu Inom- Sarritzu, nantu à a so carriera, nantu à a Corsica… Scuntremu quì un omu assai simpaticu, intelligente, è sempre cusì passiunatu da a so disciplina…

A Nazione : Chì pensate di u scontru Inom- Sarritzu ?

Jean-Claude Bouttier : Ghjè una grande inghjustizia, ghjè un arrubbecciu. Sin’ à u settesimu round, e cose eranu equilibrate, è pò dopu Bernardu Inom hà fattu un festivale, quellu di un gran’ campione.

Era magnificu ! Hè mancatu pocu per ch’ellu mettessi u so avversariu fora di cumbattu. Hà pigliatu veramente a suprana, è pò anu dichjaratu un risultatu di parità ! Era veramente di u livellu mundiale, ciò ch’ellu hà fattu ! I cinque ultimi round sò stati strasurdinarii ! Chì classa !


A N. : Cumu si pò spiecà una tale differenza trà ciò chè no’ avemu vistu è a decisione di l’arbitri ?

J.-C. B. : Spiecazioni, ùn ci ne hè micca ! O i ghjudici sò incumpetenti, è ghjè un peccatu. Perchè s’elle ci sò inghjustizie cum’è quesse, ghjè un scumpientu… d’un colpu, si passa un affare cusì… O allora sò malonesti… Perchè ponu ancu esse malonesti ! Incumpetenza o malonestità, ghjè grave ! Perchè nurmalamente sò arbitri internaziunali.

Ci vulerebbe ch’elle sianu pigliate sanzioni contru à elli !


A. N : Aviate un dubbitu nantu à u risultatu, quandu l’ultimu round hè statu compiu ?

J.-C. B. : Mancu appena ! Per mè, era più chè chjara. Bernardu Inom avia guadantu largamente !


A. N. : Pensavate chì Bernardu Inom era capace di una cusì bella prestazione à issu livellu ?

J.-C. B : Francamente nò. Sò statu surpresu. A sapia, ch’ellu era capace di fà belle cose, ma quantunque ! Sarà forse perchè era in Corsica, ind’è ellu, induve ellu hè statu aduttatu. S’ hè supranatu d’una manera magnifica !


A N. : Dopu à issa trista sperienza, u credite capace di ricummincià è d’esse infine ricunnusciutu cum’è un grande campione ?

J.-C. B. : Disgraziosamente, fin tantu ch’ellu ùn averà un titulu, ùn serà ricunnusciutu. Oghje, ùn hà nunda. St’ affare cambia cumpletamente a so vita. Ghjè un scumpientu ! S’ellu avessi avutu a vittoria ch’ellu meritava, sarebbe ghjuntu à u livellu mundiale ! Petru Paoli è Michel Acariès averebbenu fattu tuttu per ch’ ellu abbia una nova scenza à u livellu mundiale.


A N.: Avà, cumu videte u so avvene ?

J.-C. B : L’avvene è soiu ! Tocca à ellu à decide. Sarebbe un peccatu s’ellu si piantessi avà. Mà sarà capace di francà issa disgrazia chì li accade ? Cumu hà da discute incù Petru Paoli ? U so interessu sarebbe di cuntinuà. Ùn hè mancu appena frustu. U cumportamentu ch’ellu hà avutu, ùn hè quellu di un buzzore frustu !


A N. : Avà, parlemu appena di voi. Cosa hè u vostru più bellu ricordu nantu à un ring ?

J.-C. B. : Eiu, ùn aghju chè belli ricordi ! Sò statu un privilegiatu. Cum’è buzzore prufessiunale, aghju fattu u giru di u mondu. È in più, mi pacavanu per què ! À quella epica, ci era solamente ottu campioni di u mondu, è sò statu numaru dui ind’u mondu ! Oghje chì ghjè oghje, ci sò 17 categurie è quattru urganisimi ! Quand’è vo’ site campione di u mondu, ùn site chè un quartu di campione di u mondu ! Ùn hè micca à Armand Vannucci chì aghju da amparà què. Quessu, ghjè un grande campione !


A N. : Cumu videte l’evoluzione di a bozza à u livellu mundiale ?

J.-C. B. : L’evoluzione di i buzzori hè pusitiva. I giovani ùn ponu esse chè più forti chè l’anziani. Cum’è per u « centu metri », e prestazioni sò sempre più belle. Perchè ci sò i prugressi medicali, d’alimentazione, d’intrenamentu, eccetera... Hè megliu chè prima. A bozza, ella, hè cambiata perchè ci hè assai menu cumbatti. Oghje, l’affari vanu in furia. Ùn hà più omu u tempu d’amparà ! Ci hè menu mistieru, perchè si ghjunghje avà à u più altu livellu incù pochi cumbatti. Oghje, quandu un prufeziunale hà fattu trenta cumbatti, hà fattu a so carriera.


A N. : A Corsica, cumu l’avete cunnisciuta ?

J.-C. B.: A cunnoscu dipoi un pezzu ! Digià, in Parigi, avia amichi corsi. Cum’è Sauveur Chiocca chì, cum’è mè, s’intrenava ind’è Jean Bretonnel, versu 1965… Dopu, aghju avutu a furtuna d’andà in Corsica. Ci aghju da vultà da quì à pocu per un cuncorsu di bucce in Sagone. Ci hè un prublema per andà in Corsica, ghjè u prezzu di i trasporti. Sapete, ci vulerebbe à regulà stu prublema per fà chì tuttu ognunu possi scopre u vostru paese !


A N. : Vi piacerebbe à vultà ind’è noi per una impurtante manifestazione spurtiva, cum’è quella chì ci hè statu qualchì settimana fà ?

J.-C. B.: Speru chè no ghjunghjeremu incù Canal +, è chè no’ averemu mezi di più, per fà un emissione più cumpletta chì ùn cuncernerà micca solamente u sport. Per avà, sò in traccia di fà un affare divertente ! Sapete chì campu à a campagna, in Gournay-sur-Marne, à qualchì chilometru da Parigi.

Ci avemu fattu una « Commune libre du Rondpoint du Prieuré ». Ne sò, eiu, u « Grand Echevin » ! Incù amichi corsi, avemu da fà listessu affare in Sagone, una cumuna libera cum’è a meia, eppò dopu, avemu da fà una accuppiatura trà e duie strutture ! Aspettendu di fà un emissione per Canal +, saraghju da quì à pocu in Corsica per ghjucà à bucce !

Intervista fatta da Ghjuvan Guidu Talamoni