À l’accorta, cumu avete fattu per diventà un ghjucadore prufeziunale ?

Jean-Louis Leca : Sò natu in Bastia in u 1985. Aghju principiatu à ghjucà incù Furiani eppò sò statu chjappu quattru anni da u centru di furmazione di u SCB nanzu di vultà in Furiani. Infine, Hè Francescu Ciccolini chì m’hà chjamatu. U mo primu scontru prufeziunale, l’aghju fattu contru à Lens durante a stagione 2004-2005.

Greg Lorenzi : Sò natu in u 1983 in Bastia dinù. Sò à u Sporting dipoi ch’aghju 5 anni ! Sò ingrandatu ind’è stu mezu. Babbu era vice presidente.

Quandu vidia, da chjucu i ghjucadori, mi dicia chì ci vulia ch’o fussi cum’è elli. Quandu aghju avutu 14 anni, sò partutu à u centru di furmazione di Nantes. Ci aghju passatu 6 anni. Eppò aghju ghjucatu 2 anni in Belgica incù a squadra di Mouscron. Aghju ancu participatu à a cuppa Intertoto cun elli.

Infine, sò turnatu in Bastia. Ci avia pocu interessu per u campiunatu in Francia ma u fattu ch’ella fussi a squadra di Bastia chì mi chjami, hà cambiatu tuttu. Hè stata a scelta di u core. Eppò i novi dirigenti vulianu ricustruì in giru à giovani isulani per a scumessa di a cullata in Liga 1.


Nanzu di ghjucà à u Sporting, erate forse un sustenidore ?

GL : Hè bella sicura. Prima di tuttu, sò un sustenidore. Dopu, sò ghjucadore. A catastroffa di u 1992 è a cullata di u 1994, l’aghju campati da sustenidore. Quandu hè cascata a tribuna, era nant’à u terrenu. Di quessa, ùn mi ne possu scurdà. Hè un peccatu ch’ella ci fussi sta rumpitura trà i sustenidori è i dirigenti. Ci vole à parlà di più, ci vole à cuntrastà per accuncià l’affari. Capiscu dinù ch’ellu ci fussi poca ghjente quandu ellu ci hè u timpurale. Eppò si dipende assai di i risultati di a squadra. Ma in quantu à i dirigenti, si pò dì chì l’affari sò cambiati.


Cosa hè cambiatu à u SCB ?

GL : Ùn sò più listessi. Avà, ci hè Petru Paulu Antonetti è basta. L’urganigrama ùn ci hè. Quandu ci hè un spiazzamentu, hè u solu dirigente à accumpagnà ci. Quandu avemu un prublema, hè cun ellu chì circhemu una suluzione. Eppò, ci vole à dilla, hè benevule. Hè un passiunatu chì hà permessu d’accuncià u SCB. Hà rimessu l’ordine chì mancava nanzu.

JLL : Hè innamuratu di u SCB. Oramai, ghjè ellu u patrone. Certi li rimpruvereghjanu d’avè licenziatu troppu ghjente. Ùn l’hà micca fatta cun piacè. Era di sicura a sola suluzione per salvà u SCB. U risicu di falà in Naziunale c’era, in veru ! Per esempiu, e paghe di i ghjucadori sò calate assai è i spiazzamenti ùn sò più cum’è nanzu. Partimu u ghjovi è vultemu u sabbatu. Pigliemu l’aviò, u trenu, u vitturone… Hè per risparmià soldi.


Parlendu di spiazzamenti, quellu in Libourne…

GL : Nant’à l’affare Kébé, ùn avemu capitu nunda. Avemu persu un puntu ma nant’à u terrenu, ùn avemu vistu è intesu nunda. Hè statu u colpu mediaticu di a Liga chì ci vole affundà. Ma cridite la puru, ancu què, ùn ci farà micca piantà. Ùn ci impidiscerà micca di cullà.

JLL : Nant’à i stadii, si sentenu certe scimità. Ùn si ne caccianu ch’è cun noi. In Libourne, ancu Tholot, l’intrenadore, hà fattu rimpruveri à Kébé.

GL : Di tutte e manere, a sapimu chì simu mal’ visti. Per contu meiu, ne sò fieru. Quandu sentu « sale corse », ne sò fieru. Ùn ci facciu più casu è ùn ci impedisce micca di vince, in veru, nant’à u terrenu.


St’ultimi anni, u SCB permette di più à i giovani di ghjucà in a squadra prufeziunale. Hè una scelta o un bisognu ?

JLL : Quessa pò l’aghju vissuta. À l’iniziu, eramu soli incù Nico (Penneteau). Eppò, sò ghjunti Greg, Pasquà…

GL : In Bastia, avemu pochi soldi. U ceppu di u club, ci vole ch’ellu fussi u Centru di Furmazione. Ci vole à pruvà di purtà i nostri giovani à stu livellu. Ùn dicu chì ogni giovanu di u centru serà un prufeziunale.

Ùn bastanu e qualità spurtive. Per francà u passu, avemu bisognu di vuluntà dinù. Ci vole à tene forte. Quì, avemu a paura di strazià. I giovani ùn anu micca a cuscenza di i sforzi chì ci vole à fà per riesce. Ci volerebbe ch’elli si battinu di più.

JLL : Volenu tutti avè vitture belle à 18 anni.

GL : Tocca à u club di dà i mezi à i giovani di riesce.

JLL : Oghje ch’è oghje, ci hè di più giovani chì ghjunghjenu à intrenà si cun noi. Quandu andava incù i prufeziunali, era per ubligazione, quandu mancava qualchissia.

GL : A furmazione di i giovani divente un penseru maiò per u SCB.

JLL : Quandu andava à u stadiu è chì vidia e baruffe è e cazzuttate, quandu sentia « Sò elli »… Mi dicia chì ci vulia ch’o ghjochi à u SCB. Mi cullava a rabbia è a voglia d’esse, cum’è elli, nant’à u terrenu.


Sarà più difficiule per un Corsu di ghjucà à u Sporting ?

GL : Quessa sì. I sustenidori ci ne dumandanu di più. Hè nurmale. Simu da quì. Ùn avemu u dirittu di cappià. Ma d’un antra parte, quandu si tratta di furmazione, à valore uguale, pensu chì ci vole à sustene di più un Corsu. Per esempiu, in Nantes, avianu tenutu un ghjucadore di u club invece di tene ne un antru chì era forse più aggalabatu. Avà, stu ghjucadore, Toulalan, hè un tercanu !

JLL : Eppò, u Corsu, pò esse una narpia à u pianu tennicu, fisicu, strategicu, a rabbia l’averà sempre. Quellu chì incroscia a maglietta turchina, hà u dirittu di mancà certe passe !

GL : Quessa, ùn la sò… M’arricordu quandu andava à u stadiu, da 5 à 15 anni. Casanova, Camadini è l’altri eranu criticati assai. Eppuru sò elli chì ci anu fattu cullà in u 1994.

JLL : Certi sustenidori ponu esse gattivi assai. Face male à i ghjucadori.

GL : Tenite, per esempiu, Chaouki Ben Saada. Trè mesi fà, era u più pessimu. Invece avà, si sente : « u mo figliolu ». Ci vole à falla finita. Di e ghjasteme passate, ùn ci ne scurdemu. Ch’ellu fussi u migliore marcadore, hè una bella rivincita. A merita. E qualità l’hà è hà bisognu di sustegnu.

JLL : Ci sò e parolle chì ci feriscenu. Simu prufeziunali ma simu giovani. Avemu trà 20 è 30 anni. Di e volte sò statu stumacatu ma avà, sò cuntentu per Chaouki !

Qualesse sò e custrette e più maiò quandu omu hè un ghjucadore prufeziunale ?

GL : À contu meiu, ùn ci n’hè. Hè a mo passione. U prublema hè chì si pianta in furia à 35 anni.

JLL : Vai puru ! Vedi luntanu tù !

GL : Ci vole à gode di e stonde oghjinche. Più tardi, ci anu da mancà. Eppò ci hè sempre u risicu d’una ferita.

JLL : Avemu poche vacanze dinù. Eppò, ùn avemu u dirittu di fiascà. Ci sò chì ci sustenenu. Ùn ci vole micca ch’elli sianu dillusi.

GL : Quandu perdimu, ci ne stemu in casa. Aghju a vergogna.


Quale À 11 ore simu liberi. Eppò, ci hè a paga dinù.

GL : Ùn ci casticanu micca e banche quandu vulemu imprestà soldi !


Ci serà un ghjucadore chì tinite da mudellu ?

GL : Eiu, ùn ne aghju.

JLL : Nico Penneteau m’hà purtatu assai.

Postu chì si tratta di mudellu, u nostru stadiu…

JLL : Hè una vergogna ! Ci sò stati tanti morti ! Ci avemu messu tanti soldi è u stadiu ùn l’avemu ancu ! Tutti i capizzoni sò rispunsevuli. Hè un sprupositu ! Ùn anu mancu u rispettu di i morti. S’omu cunosce à Bastia in u mondu, hè per duie ragiò. Hè per e bombe è per u ballò. Eppuru u stadiu ùn l’avemu. Cosa aspetteranu ? Chì face a meria? Quandu ghjuchemu fora, vidimu stadii tremendi chì sò stati custruiti solu incù i soldi chì avemu spulatu in a tribuna nordu. Ùn ci hè nisunu rispettu per quelli chì sò cascati. Elli sì chì u tenianu caru u Sporting. À l’entrata, hè scrittu : « Vinceremu per voi ». Mi frighje sempre u core. Ùn mi sò scurdatu di i me vicini chì ci sò morti.


Per compie, a feremu à vultà in Liga 1 ?

JLL : Per avà, ùn ne parlemu micca. Ghjuchemu. Pigliemu i scontri unu dopu l’altru.

GL : Avemu ghjucatu contr’à tutte e squadre. Nisuna ci hà supranatu. Eiu, ci credu !


Greg, u to cuntrattu incù u SCB si compie da quì à pocu…

GL : Ne parlu incù i dirigenti ma hè sicura chì aghju a voglia di stà in Bastia !