Site u Presidente di u Direttoriu di u Sporting ma
per i Corsi, anzi tuttu, firmate quellu chì trenta
anni fà hà participatu à l’epupea di u Sporting.
Carlu Orlanducci : Mi pare eri ! I ricordi sò cusì
vivi. Era l’epica di Cahuzac. Tandu, l’annu nanzu à
l’epupea, averiamu pussutu esse campioni. Hè
contr’à Nantes chì l’arbitru ci hà fattu un culpacciu.
Avemu finitu terzi è ci simu lampati in sta cuppa
d’Europa…
Un antru evenimentu chì hà marcatu a storia di u
Sporting hè a strage di Furiani. 15 anni dopu, u
stadiu ùn hè ancu compiu !
Hè vera ma ci demu di rimenu. Ci hè stata una riunione
di nuvembre in Parigi incù Girardot, u rispunsevule
di i stadii per a liga. Hà messu a cumunità
d’agglumerazione in l’ubligu di travaglià. Hè
esciuta a chjama d’ufferta. U 20 di dicembre anu da
apre l’inviluppi è di regula, a custruzzione di a tribuna
Sudu averebbe da principià di ferraghju o di
marzu. A custruzzione di a tribuna sudu sarebbe
compia di nuvembre 2008 è l’inseme di u stadiu un
annu dopu. Hè una suddisfazione per mè. Aghju
avutu à core di rilancià st’affare chì sbocca avà. Era
unu di i nostri uggettivi.
Ghjustu appuntu, qualessi sò l’uggettivi di i dirigenti
oghjinchi ?
Aghju accittatu di vene à u Sporting perchè Petru
Paulu Antonetti m’hà spostu un prugettu è a so
manera di fà. Vulemu fà sbuccà u capatoghju di u
stadiu, travaglià incù rigore è prulungà a vita di u
club, nurmalamente, incù i nostri mezi. Vulemu
sustene a furmazione lucale tantu chì hè pussibile.
Per avà, viaghja bè. A furmazione, ghjè a nostra
pulitica.
Quandu parlate di « rigore », parlate di u versu
spurtivu, nant’à u terrenu, ma dinù di a gestione
amministrativa ?
Iè, di rigore u club n’hà bisognu. Petru PAulu
Antonetti hè u presidente di u direttoriu. Hè ellu chì
gestisce u club. Porta a pulitica di u club è a porta
bè. Hà fattu un grossu travagliu. Tene tutte e so prumesse.
U penseru u più maiò quandu site vultatu à u SCB
cuncernava u versu finanziariu.
Avà, i conti sò à l’equilibriu. Eramu sempre pruibiti
di ricrutà al di là di a massa salariale. Ci simu.
Pudemu piglià torna unu o dui ghjucadori. Quessa
vene da u travagliu di PPA.
U ballò hà cambiatu assai sti ultimi anni. I soldi
tenenu oramai una piazza tremenda. A sola via
per u Sporting sarà a furmazione ?
Hè Filippu Anziani, l’anzianu internaziunale chì hè
incaricatu di a furmazione. Annu, trè giovani di 18
anni anu ghjucatu incù a prima squadra. Pruvemu à
dà li tuttu. Dopu, tocca à elli di travaglià. In quantu
à u nostru prugettu, in u Borgu, viaghja pianu
pianu. Femu e fundazione di u casamentu. Hè un
principiu. Ci saranu quattru terreni. Ciò ch’è avemu
annunziatu, u femu ! Quandu averemu toccu l’uggettivi
chì c’eranu fissati, puderaghju lascià a mo
piazza. U SCB ùn hè meiu. Ci sò, è provu à fallu
campà !
Hè stata rimpruverata à u Sporting d’avè lasciatu
parte certi giovani cum’è Modesto parechji anni
fà.
U Sporting hà furmatu parechji giovani di qualità.
Dopu, ci sò i cuntratti. S’è u ghjucadore ne dumanda
troppu in pettu à i nostri mezi, ùn lu pudemu micca
tene. Quandu era ghjucadore eiu, n’aghju fattu
pochi, sforzi, per stà in Bastia ! Era una scelta. Ùn
facia nunda, eru bè in Bastia.
Cumu spiegate ch’elli si sò alluntanati i sustenidori
? Eranu 25000 à u stadiu di Francia in u
2002 è oghje chì hè oghje, ùn sò più ch’è una
manata in Furiani, ancu quandu Bastia vince.
Ci vole chì i ghjucadori avessinu a ghjente daretu.
Anu bisognu di u publicu. Tocca à a ghjente di sapè
s’elli sò passiunati o nò. Quandu si ghjoca bè, piace
è a ghjente chì và à vede li ghjucà. Ma avà, ci hè a
televisiò. Ci hè di menu passione dinù. Quandu si
paraguneghja incù l’altre squadre chì anu u publicu
daretu… Hè forse ciò chì ci hà da mancà. Dipoi chì
simu falati, ùn ghjunghjimu più à fà l’unione incù u
publicu.
Chì ne pensate di u cumpurtamentu di certi sustenitori
?
Paghemu amende ! E cundizione sò cambiate. U
sustenidore, ci vole ch’ellu venga per sustene u so
club. Ma mi si pare chì certi ùn venenu à u stadiu
chè per sustene à elli soli. Quandu ghjucava eiu, ci
eranu e bombe agricule, i fumigeni… Hè sicura chì
ci hà fattu vince parechje partite. Oghje, e cundizione,
e regule ùn sò più listesse. Hè pruibita d’accede
i fumigeni ! Li hè dumandata di falla, ma ùn
l’accettanu micca. U sustenidore si vulerebbe sfucà
ma ùn la pò più. Hè cusì.
Si dice chì u Sporting ùn si hè micca abbastanza
impegnatu ind’è u ballò in Corsica, vicinu à i giovani.
U so penseru seria troppu elitista.
Per contu meiu, quandu aghju lacatu u
Sporting, mi sò investitu incù l’amatori di u
Viscuvatu. Ma un ghjucadore prufeziunale hà un
prugramma carcu. Ùn hà micca tempu. Un prufeziunale
hè pigliatu da a matina à a sera. Di e volte, u
mercuri, ghjunghjenu squadre à vede l’intrenamentu
di i prufeziunali. Certi, per esempiu, sò falati
da u Niolu.
S’avvicina u periudu di u mercatu d’inguernu.
Pensate à arrullà d’altri ghjucadori ?
Hè una quistione di gestione. Piglieremu qualchissia
solu s’ellu ci pò arricà qualcosa incù i mezi
ch’è n’avemu.
Qualessi sò i prugetti per l’avvene ?
Vulemu tutti ricullà in L1. In L1, s’accresce u
bugettu per via di i diritti TV. U scopu hè di stabilì
u club. Quandu simu falati in L2, u risicu di falà in
naziunale c’era. Ùn ci l’anu fatta ma simu stati pruibiti
di ricrutà. Cullà in L1, sarebbe a suluzione à
tutti i nostri capatoghji !
Pensate chì l’avemu i mezi spurtivi per ricullà
quistu annu in L1 ?
A qualità ci hè. Ma sò pochi i ghjucadori. S’è
aviamu i mezi, averiamu dinù di più pretensione.
Femu assai cun pocu.
Da quì à pocu, parechji ghjucadori anu da
ghjunghje à l’usciu di u so cuntrattu…
Avemu digià prulungatu u cuntrattu di Casoni
è di Ghisolfi. Hè Petru Paulu Antonetti u rispunsevule.
Face u so travagliu…
