Poca scumessa ch’ella hè a nostra, di porghje
vi stu pezzu di carta in lingua corsa. Oghje chì
hè oghje, i Corsi sò sempre per u più analfabeti
in a so lingua o intimuriti in pettu à a so lettura.
Eppuru, ùn s’ampara à leghje chè una sola
volta è basta à pruvà per avvede si chì a lettura
di u corsu ùn vene cusì difficiule. Hè più un
prublema d’angoscia chè di cumpetenze. In
pettu à sta situazione, si puderebbe prupone
una lingua light…
È chì sarebbe què ? U Coca-cola è i caghjati
senza zuccheru, li cunniscimu, ma a lingua
pò ! Hè una manera di cuncilià u piacè è a
salute… U piacè di a lettura per a salute di a
lingua. Cusì bella st’idea ! Pare tuttu una
publicità.
Una robba light, ghjè muderna, à a moda, in
cima di a scala di u prugressu. Ma si puderanu
sempre francà i sforzi per amparà qualcosa ?
Quand’è vo’realizate un prugettu, ch’è vo’la
fate à scioglie un capatoghju, vi vene un suppulu
di piacè, ùn hè vera ? À rombu di fughje
à corri corri in pettu à ogni difficultà, li colla
l’affanu à i slaziati. Mi si pare ch’ellu fussi più
umanu l’asgiu di a scumessa !
Ci n’hè pochi esempii in u mondu… Tenite à
Churchill in pettu à Hitler o quill’altri chì anu
marchjatu nant’à a luna ! Pudianu scialà si la
in casa invece di piglià tamanti risichi. Leghje
una passata in corsu, darà di menu batticore
ma, à l’ultimu, a mi pensu ch’omu sente u
piacè, sia d’avè lettu qualcosa d’uriginale, sia
d’avè la pussuta fà.
U prublema hè chì u scopu cummunicativu di
u scrittore pò caccià una parte di u missaghju,
di a so sputichezza, di a so qualità dinù. Bellu
aspessu, e robbe light ùn sò cusì savurite… Mi
si pare ch’ellu fussi quessu un inghjocu maiò
per a lingua corsa, moltu più quandu si sà chì
simu in a sucetà di l’infurmazione è chì tante è
tante nutizie venenu in cuncurrenza, una cacciendu
l’altra, è tira avanti è tocca.
In quantu à quelli chì a si provanu à mantene
una lingua idealizata è santificata, pigliendu si
di passione per u lessicu di u scarparu di a
pieve di u so arcibabbone, a mi pensu chì s’elli
sò sinceri è s’ellu ci vole à falla, ma vistu a cursufunia
di a ghjuventù, sarebbe più ora à
demucratizà è à nurmalizà l’usu di a lingua chè
à fà ne un affare tenutu solu da spizialisti.
S’omu li dà e cundizione di a so spannata, a
lingua corsa puderà alluntanà si da u felibrigiu
elitista quant’è da u periculu light… I Ghjudei
l’anu fatta à rinvivisce a so lingua. Ùn seremu
mancu capaci noi à discità a nostra ?
Sebastianu QUENOT
