Era studiente à l’Università di dirittu ASSAS è
attempu à l’Istitutu d’Amministrazione sculare
è Universitaria di u carrughju Danton pè
cuntinuà i mio studii. Era in listessu tempu funziunaria
titulare à u Ministeru di l’Educazione
Naziunale dopu à avè insignatu in Algeria induve
avia fattu a Scola Nurmale è digià pigliatu u mio
C.A.P.
Noi altri giovani Corsi aviamu furmatu prima
l’Union Corsa cù Jojo Leonelli : U Pallò, i balli di
u cinquesimu, A chjama di u Castellare, A Casa
Corsa in Anghjone, chì s’hè trasfurmata in L’Union
Corse l’Avenir poi in u F.R.C. « Main basse sur
une ile », l’opera cullettiva di u F.R.C era esciuta in
u 1967, attempu à u libru di storia di Jacques
Gregori.
Eramu à u secondu pianu di a Sorbonne cù a bandera
corsa, accantu à noi c’eranu l’anarchisti cù a
bandera nera. Hè partuta da i studienti imprigiunati
(U Vietnam, u liberu accessu di e camere, l’auturitarisimu,
da Daniel Cohn-Bendit dettu ”Dany le
rouge”(oghje ci hè sempre ancu ind’è noi, u mascismu
forse !), micca pantaloni pè andà à travaglià,
custumi è cravate pè l’omi ! A sucetà era chjosa à
cappiu scursoghju !
Partutu da l’università u muvimentu s’hè stesu à
l’usine. I studienti andavanu à spiegà à l’operai.
Custì c’eranu i Trotskisti di a manca strema è i
cumunisti staliniani o maoisti chì s’intazzavanu, à
chì tirava quì, à chì tirava culà.
Tuttu era in bullore, a greva si stendia dapertuttu.
Ogni scagnu fecia u so cumitatu d’azzione ! Tutta a
Francia era in greva : ùn s’era mai vista, era a prima
greva “salvatica”! Cù milioni di persone in carrughju
in tutte e cità. Carlu Santoni è Ghjuvan Petru
Combette cercavanu à mezu à a greva di raghjunghje
a Corsica à u muvimentu…
À a Sorbonne s’aspettavanu à un attaccu di i muvimenti
di strema dritta ”Occident” armati di
baterchji. Un Alisgianincu di quessi m’hà dettu
dopu chì falavanu à mette u focu… A Sorbonne hè
evacuata da a pulizza : Jacques Sauvageot dirigente
di u sindicatu studiente hè arrestatu cù Alain
Krivine… L’altri stridanu : « Occident vaincra » !
A pulizza carga ! E reazzioni sò furtissime, i
“ pavés ” volanu ! (n’aghju sempre dui !) E vitture
sò rivultate. Aferraglia è l’alburi sò lampati ! E barriccate,
ci n’hè fin’à a cima di u” boul’Mich”. U
carrughju Gay-Lussac hè accampatu ! U lindumane
hè un scumpientu !
A pulizza si ficca à a ghjente, scappemu in un caffè
di Saint-Germain. Un zitellucciu chì era falatu à circassi
un pane l’anu seguitatu fin’à u caffè, a matracca
pisata ! A s’hà francata ! L’ORTF dinù era in
greva, i giurnalisti eranu in carrughju : Chapatte,
Drucker…
À u sinemà, u ” Festival de Cannes” hè arrestatu da
i giovani cineasti di a ”nouvelle vague”: François
Truffaut, Jean-Luc Godard, Louis Malle, Polanski,
Albicocco, Claude Berri, Milos Forman chì dice :
” je retire mon film”.
E donne avianu a so piazza, piglivanu a parolla
dinù, micca solu pè fà u caffè à i maschi cum’ella
dicia Simone de Beauvoir. U feminisimu si fecia
cunnosce cù u MLF, e Corse si fecianu chjamà
”Calzette rosse”. “ Il faut le même temps pour cuire
le steack d’un révolutionnaire que celui d’un bourgeois
“. A pillula cuntracettiva era stata vutata in
1967 è cuminciava appena à esse utilizata durante a
liberazione sessuale.
Pè noi a parolla « Corsitude » tirata da a parolla
« Négritude » di Aimé Cesaire è di Léopold Sédar
Senghor pigliava u so volu ind’è u nostru giurnale
”Populu Corsu”.
U Prefettu di pulizza era Grimaud. Quandu u chjamavamu
« fascista », u so figliolu, Dominique
Grimaud, giurnalista di l’Equipe, ci dicia di nò !
L’emu sappiuta bellu dopu, quand’ellu hè entratu à u Ministeru di Deferre cum’è “ Chef de cabinet ”.
Hè forse dinù per quessa chì a pulizza hè stata più
o menu tenuta.
Si sò fatti debattiti ghjorn’è notte, à a Sorbonne o à
l’Odéon. Si mischjanu intellettuali, Sartre, Aragon,
artisti cunnisciuti, Madeleine Renaud, Jean-Louis
Barault, operai, spazzini… A superba era sparita.
Tutt’ognunu si parlava. A parolla era liberata ! È u
pittittu chì si pigliava pè u patrone era sparitu
anch’ellu ! Si sentìa da tutti, cose assai interessanti :
a ghjente ùn’era quì à sente parlà l’oraculi ! Tutti
tenìanu a verità !
In cima di u bd St Michel una centinaia di pulizzeri
in “mottò” affaccanu subbitu da i piani di i casali, a
ghjente stridava è ci apria i purtò. Ci fecìa cullà in
casa soia è da quassù vidiamu un giovanu chì ùn ci
l’avia fatta à scappà. Quattru o cinque mottò li si
giravanu intornu è li si lampavanu addossu !
Da a grande manifestazione partuta da a piazza di a
Bastille, ghjunti versu u centru si sente una vuciata :
« tutti à l’Elysée, tutti à l’Elysée… ». U partitu
cumunistu hà ricusatu : a rivuluzione devia vene
sola da elli : i ripresententi di i pruletarii ma micca
da i studienti !
Chì sà ciò chì si seria passatu ?
Ame mi resta ‘ssu sintimu di spertera, di fratellanza
è soprattuttu issa prova di messa in opera di a
democrazia radicale è di autogestione. Issu sognu
resterà u mio più bellu ricordu ! S’ellu vi accade di
parlà di Maghju 68 pensate sopra à tuttu à ‘ssu
sognu : Maghju 68 hà mustratu chì si pudia stà bè
in sucetà. È s’è un ghjornu l’omi a vulessinu ?
Nota bene : “qualchì slogans” da appiegà da quelli
ch’eo pensu ! :
Il est interdit d’interdire, ind’è noi si dice : è quale
sì tù ?
- Le réveil sonne, première humiliation de la journée
!
- Elections, pièges à cons.
- Nous sommes tous des juifs allemands.
- Presse : ne pas avaler.
- Il n’y aura plus désormais que deux catégories
d’hommes, les veaux et les révolutionnaires. En cas
de mariage ça fera des révolutionnaires.
- Laissez la peur du rouge aux bêtes à cornes.
- Les murs ont des oreilles, vos oreilles ont des
murs.
- ORTF : La police vous parle tous les soirs à 20
heures.
- Imagine : c’est la guerre et personne n’y va
- A bas la société spectaculaire marchande.
- Pas de replâtrage la sructure est pourrie.
- Le patron a besoin de toi, tu n’as pas besoin de lui.
- Ne négociez pas avec les patrons : abolissez-les.
- Autrefois nous avions le pavot, aujourd’hui le
pavé.
- Soyez réalistes, demandez l’impossible.
- Sous les pavés, la plage. (le sable qui était sous les
pavés)
- Ne te laisse pas emmerder par les petits cons.
- Sont-ils vraiment révolutionnaires ? Ne donne rien
aux fachos.
E quì mettu u meiu :
Ùn hè bella a sporta chì piglia è chì ùn porta.
Maria Teresia POLI
