Cridèndusi
maestri di
l’ìsula per u
sempre, i
Ghjenuvesi vòlsenu
assicurà a so vittoria
è caccià à i Corsi
u laziu è ogni pussibbilità
di rivultassi
torna. E fubbe
cusì ch’ella fubbe
decisa da elli, soli
soli bella capita, chì
tutti i castagni di a
Castagniccia devianu
esse tagliati à u
pede ; listessu per
l’olivi di a Balagna ; di tirà fora tutti i religiosi corsi
è rimpiazzalli da Ghjenuvesi ; d’arrestà à tutti l’offiziali
di l’anziana armata di Gaffori ; di mandà via
à tutti i sgiò d’orìgine corsa; di sfassi di tutti quelli
chì fecianu un arte altru chè manuvale ; di divide
l’ìsula in ottu marchisati è cunfidalli à patriziani
ghjenuvesi è di prucede à un rimpupulamentu cun
millaie di culoni genuvesi.
Piani sìmuli, ci vole à dì chì a Corsica ne hà cunnisciutu
d’altri è ci vole à dì à favore di i Ghjenuvesi
chì elli omancu nimu i pò accusà d’avè circatu à
piattà e so intenzioni. Musulinu dopu, bellu dopu,
hà palisatu ch’ellu vulia a gabbia senza l’acelli. E
forse chì a vuluntà di vulè “cursizà l’impieghi” si ne
colla à tandu, senza ch’ellu ci sia mai statu nisun
razzismu.
Pàssonu l’anni è a situazione diventò torna favurèvule
per via di e guerre ch’elle si fecianu tutte e
putenze è chì, per quessa, cacciàvanu e so truppe da
l’ìsula. E tandu, Ghjacintu Paoli a li pruvò à rimette
in ballu una nova rivoluzione di Corsica. E cusì,
ind’u 1734, una cunsulta riunita in Orezza dà una
altra custituzione à u Paese. Parechji sapientoni
hanu fattu risorte ch’ella ùn era tantu demucràtica !
Forse averanu un’ aria di ragiò ma ùn ci scurdemu
chì quessa si fece ind’i so tempi è cun spìritu democràticu
cum’ella era diventata una tradizione ind’a
Corsica di tandu. I fatti stòrichi ci vole sempre à
vèdeli cù u ghjudiziu chì era in vigore à l’èpuca di
tandu. Arricurdèmuci dinò chè no ne èramu à trèdeci
anni nanzu à l’Esprit des Lois di Montesquieu,
sèdeci anni nanzu à l’Enciclopedia, vinti sette anni
nanzu à u Contrat Social di Rousseau !
Ind’u 1735, chì pòpuli avianu u dirittu d’eleghje i
so rapresantanti ? L’Irlanda, l’Inguilterra è a
Sguìzzera. E basta ! E noi !..
Di a rèpubblica di i Stati Uniti Americani, nimu
tandu ne sunniava !
A a Francia li ci vulerà à aspettà torna centu cinquanta
anni prima d’avè una repubblica durèvule
cun elezzioni à u suffragiu universale !
Francescu PERFETTINI
