S’hè spessu intesu dì chì a lingua
corsa ùn pudia andà cù u rock è
ch’ella ùn era fatta pè a musica
muderna. Vechju rilanciu di
cumplessu di u culunizatu ? I
numerosi gruppi di pop rock chì
sò nati st’ultimi dece anni ci
mostranu u cuntrariu è a vitalità
di stu gèneru musicale.
Semu in l’anni ottanta, a scena musicale corsa
vede nasce un ovnì chì si chjama Zia Devota.
Zia quale ? Un gruppu di donne ? Una vechjarella
? Ùn ci site micca ! Zia Devota firmerà
cum’è a prima furmazione musicale à lanciassi in u
rock corsu è à aduprà batteria, bassa è ghitarra elettrica.
I testi di e so canzone sò scherzosi è i temi
oghjinchi. Cù u so unicu album, Falsi cunsiglii, anu
d’una certa manera preparatu l’orechje corse à sente
rock cantatu in lingua nustrale.
Ma forse Zia Devota hè stata troppu avanguardista
? U fattu si stà ch’ellu ci vole à aspettà a fine
di l’anni novanta per vede un antru gruppu sorte un
dischettu di rock à l’usu corsu : tocca à i bastiacci
Les Varans cun Icaru Blues (1997). Esceranu un
antru dischettu, MNF (per mi n’enfuttu) in 2000 è
un dischettu di trè tituli Gulliver di Siscu in 2002.
Infiammeranu parechje serate in i caffè corsi è firmeranu
cum’è una furmazione di grandi musicanti,
cun successi cum’è U Pastizzu, MNF o APressione.
A via hè aperta è d’altri gruppi si lancianu pocu à
pocu. Eccu I Cantelli chì escenu u so primu dischettu
intitulatu I Cantelli, in 2001. Gruppu di
sgaiuffi chì animeghjanu e serate studientine in
Corti, inventanu u « pop rock festivu ». È si e so
canzone parlanu spessu di briachine, tenenu un
sgardu acutu è scherzosu nant’à a sucetà corsa : « o
mà, ùn vogliu andà à vutà / ùn vogliu fà u tappinu
pè vechjacci in flacchina / sì dopu pè ringrazià / mi
facenu travaglià / cum’aghju da fà ? ». Invece u so
segondu dischettu, Cunniscenza di u corpu umanu
esciutu innù u 2005, si vole più neru è marca u principiu
d’un travagliu cun Marcu Biancarelli chì zifra
parechji testi. Ci si parla d’una Corsica bella sfarente
da quella vantata da l’offiziu di u turisimu. Da nutà chì dopu à st’album, i membri di I Cantelli
separanu e so vie per esce ognunu u so dischettu :
ch’ellu sia Paul Cesari (Electric Cultura, 2006),
Tonton (Tonton, 2006), Paul Miniconi (Elisiri di
Vita, 2007) è quellu à vene di Pierre Gambini.
Eccu dinù à L’Altru Latu. Digià dui dischetti per a
furmazione chì hè nata in a Gravona : Cattivu
sognu in 2001 è Com’un omu in 2006. Cù una
musica enèrgica, cantanu a Corsica d’oghje cù e so
suffrenze, e so inghjustizie è e so spere. Anu fattu
una ripresa di À tè pratendu, esciuta guasi trent’anni
fà in l’album A strada di l’avvene di Canta u
Populu Corsu ma di manera rock. Un sìmbulu di a
leia trà u Riacquistu è u rock.
Dédé Sekli ellu hà digià un riccu passatu : hà
accumpagnatu à Felì, hà sunatu è cantatu cun I
Surghjenti è Isula. Ma hà sceltu di fà carriera solu è
innù una via pop rock. I so dui dischetti (Sekli è
Davanti) anu cunnisciutu un bellu successu chì ne
chjama d’altri.
I Sumeri Castrati, si definiscenu elli stessi cum’è
essendu « 50% rock, 50% magagna » è cun tituli
cum’è O Niculà dedicata à u presidente di a
Republica o ancu Cristacciu, ghjudicate da per voi :
« Eramu in Aiacciu è di ferraghju / S’affacca un prefettu
è si manghja trè balle / Cristacciu, s’ellu ci hè
un diu hè spessu in greva ».
L’aiaccini d’Erin anu sceltu elli a so via originale,
cù un dischettu (Erin) piuttostu hard rock esciutu in
2007. E so ispirazioni venenu da ACDC, Led
Zeppelin o Trust. Ci vulia à salutà sta perfurmanza !
Moltu più ch’ellu anu à Rinatu Coti cum’è cumpare.
S’elli ùn anu riesciutu elli à fà a leia cù a generazione
di u settanta…
Ammintemu dinù u gruppu Noi. Hà esciutu u so
primu dischettu Resilienza in 2007 cù Freddy
Olmeta, anzianu di Les Varans, cum’è capimachja.
A furmazione Notte hà sceltu anch’ella a so propia
via origìnale, trà pop, lounge è electro. S’hè fatta
rimercà cù a so ripresa di u successu di Katie Melua
Nine million bicycles cantata da Francine Massiani
è diventata Millioni di bissiclette (Aldilà, 2007).
Infine ùn si presentanu più I Novi chì si sò fatti
rimarcà cun dui dischetti di più pop (N9vi è U
Portaluci) rimarcati subbitu esciuti. A furmazione
di Ghjuvancarlu Papi cunnosce un successu tremendu
in qualchì mese solu.
Eccu per stu girettu ràpidu di a scena pop rock corsa
dapoi una vintina d’anni. Tutti st’artisti anu fattu a
scelta di cantà in corsu, cù e so influenze è e so sensibilità
sfarenti. Sò a prova d’una vitalità sigura di
stu gèneru è a dimustrazione chì a lingua corsa pò
sprime realità oghjinche in un’andatura muderna.
Quandu in più di quessa sta forma musicale hè purtata
da musicanti di qualità, allora si pò veramente
cunsumà senza muderazione…
Petru Paulu de CASABIANCA
