Sti pochi tempi, u novu presidente di a Republica Francesa, da ch’ellu hè statu elettu, senza aspettà l’investitura, s’hè fàttu una scappata di dui ghjorni pè l’isula di Malta.

Un amicone soiu, carcu à soldi, u t’hà invitatu nantu à u so’ « Jet » privatu pè ghjunghje in Malta induve l’aspettava un iottu di quelli, da navigà nantu à u Mediterraniu cù a so’ piccula famigliola. Piccula… quessa ùn si pò tantu dì ; perchè trà i so’ maschi (sò trè è dui sò corsi !) è e duie figliole di a moglia, eccuti sette persone da capitumbulà pè issi belli giardini di l’Eliseu è da pranzichjà à contu di A Republica.

Ma per avà, ne simu sempre à u iottingu da girandulà pè Malta.

Or pensate chì Malta ghjè un’isulella tamant’è u Capicorsu ; vale à dì… 28 volte più chjuca chè a Corsica ! Forse ùn la sapete micca, ma st’isula di quattru centu mila abitanti, dipoi u 21 di settembre 1964, dunque più di quarant’anni, stu paese ghjè indipendente ! è u 13 di dicembre 1974 ghjè diventatu una republica.

Un tippone dentru à u mare chì ùn hà mancu abbastanza acqua da beie ! Certe istatine, a fàcenu vene d’Italia !!

Ancu si Malta hè un paese europeanu induve l’agricultori sò menu di 2,5% di a populazione attiva, questi quì, in una decina d’anni, anu dàtu un forte valore aghjustatu à culture tale e fraule, i chiui, l’avucati è a so produzzione d’acquacultura putèria esse espurtata in Italia è ancu in lu Giappone !

Hè vera chì a so’ flotta cummerciale ghjè a quarta mundiale dopu à Panama, U Liberia, è A Grecia.

Stu novu Presidente di a Republica, averà pensatu à tuttu què ? Mentre ellu si fàcia imbrustulì cun braghette mozze è baretta rossa (Ferrari ?) incalfata. Dipoi tandu, ghjà ch’o ci pensu, pare chì dui novi ministri anu mamme corse ; Jean Louis è Valérie ; ùn mi dumandate e casate perchè ùn le sò scrive è puteria fà sbagli.

Quantunque, i media ne avianu parlatu, si aspettava à André Santini à a cultura ! Omancu, l’autore di « Ô Corse île d’humour » ci averia fàttu ride una cria. Ùn hè veramente micca statu ricumpensatu pè u so’ vultulimme, passendu da Bayrou à Sarkozy… forse ci scriverà un altru libracciolu per dà u so’ sintimu è quessa torna, cun estru umoristicu ; cusì senza serveci troppu di « soupe à la grimace » issu novu libru si puteria titulà « Ô France trêve d’humour » ! Peccatu quantunque !… u cunnoscu persunalmente è di sicuru, mi pardunerà.

In tantu, u novu Presidente francese, da ciò ch’omu dice, ùn sterà tantu à rivene in lu nostru bellu paese di Corsica da fàssi pranzi incappunati1 - pesci micca pullastri, chì pullastri n’hà avutu abbastanza - insampetrati2 aziminati3 è aligustati4, cumpiendu u pastu d’una ronda di furmagli è casgi corsi, brocci à l’acqua vita cun fiadoni è fiadunetti ; inquantu à u brocciu è u furmagliu, tuttu parlandu di u paragone ch’ellu si puteria fà tra Malta è a Corsica, basteria ch’ellu ùn ci ghjunghi tandu - fàtta a so’ analisa - invece di a frebba di Malta…e frebbe di Malta !

Ma, paragone per paragone, prima, ci era l’eroe di B.D. Corto Maltese… Avà, ci avemu… à Sarko Maltese !!

Petru VACHET-NATALI

stu 21 di maghju 2007 ghjornu di Santa Ristituda.

1. Incappunati : fr. : à base de chapon (poisson).
2. Insampetrati : fr. : à base de Saint- Pierre (poisson).
3. Aziminati : fr. : à base de bouillabaisse.
4. Aligustati : fr. : à base de langouste.
Neologismi inventati da l’autore.