U populu corsu, per sopravvive,
hà circatu a so’ salvezza
in lu secretu : secretu di e
famiglie, secretu di e sette (i
Giovannali in lu XIVu seculu), secretu
di e cunfraterne, secretu di è
Loggie è società secrete…
Si ritruverà in l’impiantazione di a
massoneria in Corsica è sopratuttu in
le società secrete, l’isulani paradossi
di a discordia (ogni partitu suscitendu
un partitu cuntrariu) è di a
sulidarità (al dilà l’opposizioni, si
ferma solidarii). E Loggie seranu
successivamente loggie militare (“culuniale”), loggie
aperte à i sgiò lucali…
Dipendente essenzialmente di u Grande Oriente di
Francia, seranu secondu e vicende di a storia, à
quandu lealiste à quandu in l’opposizione. Seranu
messe in surveglienza (è puru dinù sottu à quella
d’anziani massoni « liberi muratori ») ed aspessu
cundannate à mettesi tutalmente in canteghju…
Certe trà d’elle seranu in relazione cù e loggie di u
« cuntinente » è di a « terra ferma » (si puteria
ancu parlà d’un « triangulu massonicu » trà e trè
cità di Bastia – Livorno – Marseglia induve si mischjanu
è si tramischjanu influenze bell’aspessu
cuntradittorie). Eppuru, l’opposta pulitica vera si
manifestebbe in le società secrete. Si puteria pensà
chì u carbonarismu di u Jura (Les Bons Cousins), da
prima impiantatu in le Pruvinzie Napulitane, à
l’epuca di u rè Murat, poi perseguitatu, sia passatu
da a peninsula taliana in Corsica induve e
« Vendite » anu prusperatu à partesi di l’annate
1820. Sò principalmente l’esiliati pulitichi taliani
chì anu avutu un rolu puliticu maiò pè a creazione
è u sviluppu di u carbunarismu in Corsica ( Filippo
Buonarotti, Antonio Galotti, Francesco Passano,
Giovanni La Cecilia, Giuseppe Mazzini…)
E Vendite, à voline più, anu da fà cresce i partisgiani
di a « Giovina Italia » di Mazzini.
U prughjettu d’una grande cuspirazione avendu per
finalità a liberazione di l’Italia grazia à a fusione di
a Carbuneria corsa in la « Jeune Europe » ùn
duvia riesce per via di u tradimentu di u Corsu
Carmelo Ardiglio… À partesi di 1835, i Carbunari,
republicani è liberali, si ritruveranu in la società
secreta di i « Pinnuti », particularmente impurtante
in la pieve di Moriani. Di seguita, in lu 1848,
i « Pinnuti » seranu à l’origine di una nova società
secreta, “la Marianne”.
I ligami di Garibaldi cun e loggie è e società secrete
isulane parenu esse stati fàtti essenzialmente da
raporti persunali cun certuni di i so’ membri tale
J.P. Borghetti ossia u duttore Padovani di Bastia.
Marie-Jean Vinciguerra, Traduzzione corsa Petru Vachet-Natali
Strattu da u libru di M-J Vinciguerra « Garibaldi
un insulaire franc-maçon » (da esce).
