Hè in Pruvincia chì G. Soletti spone e so prime òpere ind’u 1969.

Stu pittore bastiacciu chì hà amparatu à di per ellu, curiosu di a storia di l’arte à da a so giuventù è più particularamente di a pittura, hè assai influitu da a Scola Pruvinciale è per u più da u pittore Olive di u quale certe òpere fùbbenu pitturite in Corsica (1848-1946)

Si stalla in Corsica Suttana in l’anni 70. U so mistiere ùn li dà più tempu à cunsacrassi tantu à a so passione ma face ch’ellu si pò tramutà da a Francia, à l’Italia, in Spagna duve ellu pò cultivà a so tendenza à l’arte è allargà a so vista di i pittori paisagisti.

S’ellu tralascia per un pezzu e sale di sposte, prufitta di i so viaghji per dissegnà, è realiseghja qualchì tela à l’intenzione d’un cìrculu d’ìntimi.

Vultatu ch’ellu fubbe in Corsica d’Insù, si trova torna ind’u so elementu è torna à mèttesi à a pittura, spirata da i paisaghji di u so rughjone.

A principiu di l’annu 2005, decide di prisentà torna u so travagliu à u pùbblicu ind’u mentre di a sposta “Angulu Temàticu” organizata in Marseglia, è po piglia parte à un cuncorsu di pitture “Paese Corsu” in Arena Viscuvatu induv’ellu riceve u prima premiu di u ghjuratu è u prima premiu di u pùbblicu. Incatena cù a sposta “u Sulaghju, paese d’artisti” d’Aostu è decide d’ùn cunsacrassi più chè à a so arte è di fanne u so mistiere. Malgradu e difficultà ch’ellu scontra ogni artistu chì sorte, G. SOLETTI s’inchjocca ind’a so vuluntà di riprisentà a Corsica ind’u so stile figurativu per u piacè di l’ochji. Paesi, carrughji, fanali, torre sò i temi principali di e so tele. Frà elle, una titulata “carrughju Santa Croce” era prisente di Decembre 2006 à u Salottu Naziunale di i Belli Arti in Pariggi, Caroussel di u Louvre.

“Fanale Rossu”, una di e so ùltime tele , hè un omaggiu framante à u so longu sterpugliu di marinari di Terra Vechja induv’ellu seria u so votu u più caru di stallà u so attellu.

“Pitturiscu à parte di i sbozzi realizati nantu à u mutivu è ch’o annuteghju di manera assai precisa fènducci una messa in culori cù una mina d’acquarella, perchì benchè tenendu caru l’ambiu di l’attelli di pittura, sò incapace di pitturisce ciò ch’o ùn cunnoscu. Facciu sempre u giru di u locu ch’o mi dispongu à pitturisce perchì i spazii, e prufundezze hanu assai impurtenza per mè. Aghju a primura di i purmenori è, passendu u tempu, u mo dissegnu s’hè messu in cunsunente cù a mo pittura !

Mai ùn mi dispiazzu troppu luntanu da Bastia perchì ind’u mentre ch’o facciu u mo quatru in l’attellu, m’abbisogna di vultà nantu à u locu parechje volte per esse sicuru d’un detagliu chì a mo memoria ùn hà arregistratu o per inguantà u muvimentu, truvà u rìtimu, sente l’atmòsfera ... perchì hè quessa, nanzu tuttu ch’o cercu à mette ind’i mo quatri, aiutatu da a magia di a pittura cù l’ogliu ! U tempu ùn hà impurtenza : mi ci tocca, più o menu, un mese per dà capu à un quatru.

Ind’un paisagiu, un paese o un carrughju, un sughjettu mi pò vene in core da solu u culore d’un lenzolu nantu à un cànapu, un ombra o un lume incalcatu, a prisenza d’un oggettu postu nantu à un cacciafora, un muru pitturitu, turnatu à pitturisce è discalcinatu ... a vita ! U pittore face vede ciò chì a ghjente ùn vede micca sempre. Tuttu rumena, tuttu hè muvimentu perpetuale.

Hè scarsa ch’o pitturisca persunaghji nantu à i mo quatri ma sò sempre prisenti da e so realisazioni stesse : sò elli chì hanu lasciatu è làscianu torna e so vistighe ind’i giardini, i muri, l’usci è e case creendu cusì a mo paletta di culori. Quand’omu pitturisce un locu, si pitturisce dinò a so storia cume quella di a ghjente chì ci hè attaccata.”

Pittore qualificatu architetturale, piglia strada è ci prumette per a so prùssima sposta una visione di a nostra ìsula più vicinu da a natura.

Ritruvate à G. Soletti nantu à www.acryom.com

Lisabetta Studd, Traduzzione Francescu Maria Perfettini