Ghjocu à ballò

- U Sporting è l’ACA s’approntanu à disputà un’altra stagione in campiunatu di Leca II. U presidente Michele Moretti vene di cunfirmà à Gernot Rohr, cum’è u nuvellu intrenadore aiaccinu.

L’anzianu difensore di u Bayern Munich è direttore tennicu di Bordeaux è Nizza succede à Rudd Krol. L’ACA si rinforza è puderebbe quist’annu fà parlà d’ellu, malgratu un campiunatu chì s’annunzia più chè difficiule second’à a stampa specializata.


In Bastia, Petru Paulu Antonetti, fratellu di Federicu, attuale intrenadore di Nizza, pare esse u nuvellu omu forte di u Sporting. Hà prumessu, secondu i mezi è sott’à u cuntrollu di a federazione, chì u SCB sia torna in ballu pè circà d’ottene una di e prime trè piazze di stu futuru campiunatu. Per avà, tuttu pare esse in cunfurmità pè fà trimà i più forti di sta Leca I, cum’è a ci mostra a vultata di Fabriziu Jau, dopu esse passatu pè Sedan.

In aspettendu d’altri rinforzi, Antonetti è Orlanducci sò duie forte persunalità, capace di permette à u SCB di ritruvà u so publicu è un’ambizione.


- Bastelicaccia , campione di Divisione d’Onore !

Dopu esse statu sacratu campione di Corsica, in Divisione Onore, a squadra di Bastelicaccia s’appronta à disputà u difficiule campiunatu di CFA II. Tant’auguri pè a seguita d’issu bellu parcorsu aiaccinu.


- I premii è altre infurmazioni

Didier Giorgetti, centr’ avanti di l’AS Nebbiu, hà finitu migliore realizadore di a Divisione d’Onore. U premiu di u più bonu intrenadore hè statu datu à Niculau Gagliardi.

A u livellu naziunale, U Borgu, Porti Vechju è l’ACA chì sò stati purtati in Divisione Onore anu decisu di fà appelu di sta decisione di a federazione. A seguità.

Kassi Ouedrago incù 22 realisazioni in 34 scontri hè statu elettu migliore centr’avanti di CFA. Un zitellu pienu d’avvene.

Franck Muller, incù 14 rete, hè statu quant’à ellu u migliore centr’avanti di i gruppi C è D di a CFA II.


Foot ind’è i giovani

A cuppa di i benghjamini à l’ACA chì hà sfattu in finale a squadra di Bucugnà pè 1 à 0.


Foot – 15 anni

U SCB hà battutu a squadra balanina di U FAIRM in finale


Foot –13 anni

Sempre u SCB chì hà vintu di fronte à l’EFB pè 3 à 2.


Challenge Alex Stra

Scontru trà suttanacci in finale. E ghjè Pruprià chì hà vintu a cuppa faccia à Porti Vechju, dopu una partita stretta è indecisa.


Corsa à pedi

Pinschina di Pruprià un’hà lasciatu à nissunu a prima piazza. Novu rè di u Capi Corsu davanti à 145 participanti, Pinschina hà fattu soia l’ottesima corsa di Finochjarola.

In Biguglia, ghjà Lurenzu Lanfranchi chì hà vintu davanti à Loschman.

In u giru di u Capi Corsu, organizatu da u Sprint Racing Club, ghjè Julien Alvarez chì hà finitu u primu di fronte à Vincenti è Branca.


Corsa di vitture

- Gérard Bley incù una Porsche RS hà finitu primu di u Corsica Historic Rally.


9esimu Rallye di Pila Canale

49 vitture anu compiu stu 9e rallye di Pila Canale. Ghjè Pietri, nant’à a so 306 Kit Car chìhà finitu incù 12 seconde d’avanzu in faccia à Casalta. Dopu a corsa di Sartè è quella di a Costa Serena una terza vittoria pè u Pruprianincu.