Ghjocu à ballò

- U scontru “derby” trà Aiacciu è Bastia hà vistu a vittoria di u Sporting, chì pò dunque sperà una piazza in alta classifica. I ghjucadori di Casoni in prima leca, perchè innò ?

- Dopu à l’eliminazione di l’Algeria in cuppa d’Africa di e Nazioni, Jean-Michel Cavalli s’hè vistu smette di e so funzioni d’intrenadore naziunale. Eccu l’aiaccinu prontu à ritruvà u più prestu un’altra squadra, chì puderebbe esse torna in Africa secondu certe vuciate.

In quant’à u so figliolu, Johann, cumencia à fà parlà d’ellu in Belgica, in Mons, vistu i belli scontri ch’ellu riesce dipoi a so venuta.

- U Corsu Patriziu Luzi-Bernardi, titulare à u postu di “goal” in Rennes, si face rimarcà ogni volta ch’ellu ghjoca, pè u più gran’piacè di i “supporters” brittoni chì chjamanu a so casata incù tanta felicità. Forza Patriziu.

- Tony Vairelles volta in Bastia. L’anzianu internaziunale francese, face dipoi st’annu u piacè di u CAB, squadra cara à Antone Emmanuelli. Si pò dì chì “i negri” ponu pretende à una classifica di scelta in CFA. Hè vera chì u campiunatu naziunale face parte di e viste di a direzzione bastiaccia.

- L’anzianu purtiere di u Sporting, Nicolas Penneteau, tene una grande forma in Valenciennes chì punta à a nuvesima piazza di a classifica di a leca una.

- Detta da Mickael Essien, l’anzianu mezu terrenu di u SCB : “ Hè grazia à Bastia s’è oghje sò diventatu titularu in Chelsea”.


Vitture

- Manzagol à l’onore postu ch’ellu hà vintu davanti à Benazzi è Succi, u sestu rallye regiunale di San Martinu. Ghjè Julien Filippi chì hà vintu u gruppu N.

- Dopu à l’abbandonu di Manzagol, Pietri, Leandri, Casabianca è Baldrichi si sò fatti rimarcà nant’à e strade di a corsa di a Machja. A stu ghjocu, Pietri, nant’à a so Renault Megane, hà vintu u 22u Rallye di a machja. Una vittoria chì li permette d’esse u novu campione di Corsica di u 2007.

Pè u gruppu N, salutemu a vittoria di Jean-Jacques Papini.


Tennis di tavula

U PPCB hà festighjatu i so 50 anni.

Gilbert Arcamoni hè statu u primu presidente di u PPCB, è quessa da u 1957 à u 1977. Dopu ci hè statu Robert Lamberti da u 78 à u 83, Michele Lorenzi da u 84 à u 86, Filippu Marchioni da u 89 à u 93.

Dipoi u 94, hè Jean François Brumbt chì dirige issa squadra incù maestria è tante qualità di cumpetitore ch’ellu hà sempre.

Una grande festa pè i 50 anni di u PPCB hè stata messa in ballu nentru à a sala Pepito Ferrandi. A participazione d’Anthony Peretti è di a squadra di u CPC di Nizza fù unu di i mumenti forti d’issa reunione.


Corsa à pedi

- Macinaghju-Centuri nant’à a strada di i duganeri, hà vistu a vittoria di Akhdar Loucine davanti à Verdier è settanta altri cumpetitori. Stephanie Mattei, prima zitella, hà torna fattu impressione.

- VTT è corsa à pedi in Lecci : à stu ghjocu, Paul Piris hè statu u primu davanti à i filanci Carlotti è Luciani.

In squadra di dui, Marc Constant è Franck Albertini, sò stati i più forti, allora chì a corsa à pedi hà vistu u sucetariu di l’AJB piglià a suprana nant’à Careddu, Achimini è Pattacchini.

Pè finisce, i campiunati di Francia di Cross di u 2010 duverebbenu tenesi in Corsica. A leca di Corsica hà postu a so candidatura à a FFA. Cusì l’hà fatta sapè Michel Huertas, u presidente di a LCA, dopu à l’AG d’Aiacciu a settimana scorsa.


Cavallu

Fabien Gonzales hà vintu a cinquesima corsa di a Costa Serena di fronte à Dumè Simi.