Giru di a Corsica
di u 2007
110 participenti à u 51u
Rallye di Francia, giru di
Corsica. A prima tappa,
430.78 chilometri, è
124.28 chilometri in sei
speciali s’hè fatta u 12
d’ottobre. « L’armata
Citroen » è u so capu,
Sébastien Loeb, ùn anu
lasciatu à nimu a vittoria.
Ghjè a terza vittoria pè Loeb in Corsica.
D’altronde, salutemu a squadra Leandri-Luiggi chì
hà compiu sta corsa à a 15a piazza di a classifica
generale, incù una piccula vittura (Skoda WRC).
Altri piloti in vista, Titi Muselli, nant’à una Clio RS
chì hà vintu in classa 3 è u nostru cumpagnu José
Micheli, chì à più di 60 anni, hà toccu l’arrivata.
Ghjocu à ballò
Jean-Louis Cazes, l’anzianu difendidore di u SECB
di l’epica di a cuppa auropeana di u 1978, hè oghje
l’intrenadore di u club bascu d’Anglet Genêt
(CFA), una squadra chì puderebbe, vistu i so risultati,
ghjucà l’annu prussimu in u campiunatu naziunale.
U nostru amicu bascu, chì dice tene a Corsica in
core, hà lasciatu tanti boni ricordi in Bastia.
Pè contu soiu, l’intrenadore corsu, Natale Tosi,
figliolu di a marina in Bastia, vene di firmà un cuntrattu,
cum’è rispunsevule tecnicu di Cherbourg.
Nanzu à què era statu sbarcatu di a squadra naziunale
di u Congò. In 21 anni di carriera, Tosi hà travagliatu
incù 14 squadre francese è e squadre di a
Muritania è di u Congò… ma nisunu postu in
Corsica. Andate à circà perchè.
Dopu l’affare Chibomda, dui anni fà in Furiani, u
Sporting è i so supporters sò torna una volta detti
razzisti. Un certu Boubacar Kebe di Libourne-Saint
Seurin, spulsatu in corsu di partita è surtitu fendu
un ditu « tesu », ùn hà trovu di megliu cà dì chì i
qualchì spettadore bastiacci prisenti, in stadiu,
l’avianu insultatu. Un hè pussibile, cascaranu tutti
nant’à u Sporting, chì s’hè vistu caccià un puntu, da
a cumissione di a Leca à a classifica.
Sicuramente chì Ejidé, Ben Saada, Mendy, chì si
trovanu bè in Corsica, ùn ci capiscenu più nunda !
In quantu à l’intrenadore di Grenoble, dopu à u
scontru in Bastia (0-0), hà dichjaratu « sò assai
felice di u risultatu perchè in Corisca ùn hè mai
faciule di ghjucà, vistu u cuntestu speciale ». À
dilla franc’è chjara ùn ci era mancu 2000 spettadori
ind’è e tribune pè stu scontru.
Mathieu Flamini, u giovanu di Marseglia, uriginariu
di Guagnu,, hè titulare in Arsenale. Eccu un
bellu affare pè stu zitellu chì si dice fieru d’esse
Corsu.
Torna un ghjucadore corsu chì face parlè di ellu !
Pascal Berenguer, u Curtinese, face parte di a squadra
di Nancy, attualmente in testa di a Leca 1, in
cumpagnia di Liò. D’apressu à a stampa specializata,
Berenguer serebbe unu di l’omi forti di sta
squadra di Nancy.
Gilles Cioni, micca ritenutu annu in Bastia, hè titularu
in naziunale in Pariggi, ind’è a squadra di u
PFC, intrenata da l’anzianu difendidore di Lens,
Jean-Guy Walleme.
U più vechju intrenadore corsu in attività hè Lulu
Accorsi, chì si trova avà in Hanoi, induv’ellu s’occupa
di a furmazione di i giovani.
U CAB, u club caru à Antone Emmanuelli, vene di
fà firmà un certu… Tony Vairelles, anzianu internaziunale
è Bastiacciu. À trent’è quattru anni, pò
sempre fà, in CFA, trimà e rete !
Incù Vairelles, ma dinò Aljibois è Prince, aspettatu
sta settimana, u CAB hè prontu à finì “in bomba” è
forse ritruvassi l’annu prussimu in Naziunale !
Corsa à pedi : machja di Costa
Verde
19 chilometri di corsa, sopr’à e muntagne di u
Murianincu, è una bella vittoria pè Hanciar,
davant’à Boschi è Biaggi. Una vittoria è una corsa
in memoria di Claude Olivesi, sparitu à u mese di
ghjugnu.
Stéphanie Mattei hè stata a prima zitella à a classifica.
