Tanti anni fà, pocu tempu
dopu à l’apertura di u 1981,
l’Università di Corsica ùn si
sapia tantu à u ghjustu
duv’ella era nè mancu troppu
cum’ella era. È l’Università
chjamata Pasquale Paoli,
ancu di menu. Allora, quandu
qualchì scagnu di cuntinente
avia bisognu di piglià cuntattu,
e sentiamu belle! Ùn era
scarsu ch’omu ricivissi una lettera intestata cusì :
“Monsieur Pascal Paoli, secrétaire général de
l’Université de Corse, 20250. Corté ”. U Babbu di
a Patria ne hà intesu tante chì ùn ne averà avutu
frizzione mancu stampa! Hè vera chì Pasquale
Paoli ti avia e spalle larghe è l’anima generosa: à
chì amparava cù l’illuministi di tandu, soca sarà
statu attu à capisce chì l’omu mudernu ùn hà una
vistura sola. È po quelli chì scrivianu, impiigati,
funziunarii, averanu pensatu chì secretariu generale
era ancu una bella situazione... è sarà cusì...
Oghje, ùn accade più chì a nostra università hè
cunnisciuta. Megliu cusì.
Ultimamente, annunziendu e cerimonie di a celebrazione
di quistannu, u Cunsigliu Generale di a
Corsica Suprana hà ramintatu chì Pasquale Paoli
hè statu u so primu presidente. Sarà stata cusì...
ma face ride, face. Hè vera chì presidente sarà una
carica più di pesu chè secretariu generale, ma
ahù! face ride quantunque. Videte, saria cumu...
saria quantu à presentà à Mallarmé cum’è prufessurellu
di inglese, è scurdà si di u gran pueta chì
ellu hè statu. È ancu, pare chì Mallarmé prufessore,
i so sculari li facianu u tazzu durante i corsi.
Innò, ùn circate micca di più u paragone, chì era
solu per dì. Ancu à Pasquale Paoli li ne anu fattu
quant’è Cuchjina, ma ùn si pò paragunà.
Allora tantu peghju s’è no lachemu da cantu issa
presidenza dipartimentale di Pasquale Paoli.
S’omu ne perde u ricordu, ùn hè tamantu dannu!
Allora, u Generale di a Nazione, u Babbu di a
Patria, u Figliolu di i Lumi, u Precursore di e legislazione
muderne, oramai l’Omu storicu hè riveritu
propiu à l’altura di a parte ch’ellu hà chjappu
in u distinu di a Corsica, a diplumazia è a geopulitica
di ista zona di l’Europa duv’è no stemu. Era
ora ch’omu u rimpatessi di tutte l’inghjulie è
accuse fatte li da dui seculi. Senza cuntà chì i partiti
chì si inguccionu quand’elli fecenu u deputatu
in u 1838, u caccionu da a so tomba è, pè i so tornaconti,
vutonu “L’Ombra di Pasquale Paoli”. Un
affare stranu, quantunque, quellu di u 4 di marzu
1838! In fatti, un veru scandalu degnu di e più
goffre manovre eletturale. U ci spieca Salvatore
Viale chì era à l’appollu. Per isse elezzione di u
diputatu in a circuscrizzione di Bastia-Calvi-Corti
eranu in cuntrastu l’avucatu Saverio Casabianca è
Giuseppe Limperani. Eranu 158 grandi elettori à
vutà. Primu giru: vutanti: 157; magiurità assuluta :
79. Casabianca face 74 è Limperani 76. Si torna à
vutà: Pasquale Paoli ottene 80 voti. Tandu si scatenanu
i cumenti di i giurnali parigini : ma chì vole
dì issu nome di Paoli, in issa elezzione? Ùn hè
micca ghjuntu à casu. U deputatu de Jussieu prupone
ancu chì i Corsi, durante cinque anni, ùn
avessini più u dirittu di vutà. Tutti issi erziculimi
ùn fecenu prò à nimu è longu à i dui seculi scorsi
a figura di Paoli ne hà vistu è po ne hà vistu.
Oghje pare chì e litiche sianu appaciate è arregulatu
u valore simbolicu di issa riferenza maiò di a
storia corsa è di i tempi muderni. A prova si ne hè
chì i redattori di u “Dictionnaire historique de la
Corse” (Albiana, 2006) li anu datu pagine quantu
à Napuleone: sintenza di pacere! Ma soca ùn ci
vole à ruspà troppu, chì lighjendu isse analisi è
presentazione si sente ch’ellu ùn hè compiu u
cuntrastu.
Hè megliu cusì: e statule fisse, agrancate è monocromatiche
valenu pochi fichi. I monoliti ci garbanu
stantarati in Filitosa, ma in Corti innò.
St’annu di a cumemurazione vede sviluppà parechji
prugetti è realizazione di qualità. Per certi
altri, ci hè da dumandà si s’ellu ùn sò micca mossi
solu da l’opportunisimu è/o l’interessu piglianciu.
Spessu si vede chì l’accennu à Paoli ùn hè chè una
scusa. Ma pè u più, si pò esse sicuru chì a cunniscenza
di Pasquale paoli, u so tempu, a so opera è
a so lascita universale ci surterà à bè. Accrisciuta
è precisata.
Megliu cusì. Megliu ch’ellu ùn si possi incappià
cù una dignità sola. Presidente di cunsigliu generale?
U vestitu saria statu troppu strettu.
Ghjacumu Thiers
Prufessore à l’Università di Corsica
