Sti pochi tempi, l’invernu hè ghjuntu à bon’ora è
s’hè firmatu sin’à tardi, lampendu mantelli bianchi
nantu à u circondu, cudrendu à tempu lazii, voglie,
desideri è speranze perchè a vita d’ùn sò quanta
ghjente, à sti ghjorni, diventa più difficile chè mai.
Parechji ùn si pònu più allughjà da quant’elle sò firmate
miserose e paghe è crisciuta a vita. Tanti ritirati,
ùn facenu più chè un pastu à ghjornu ; di
« l’eremistti » è i zenza impiegu ùn si ne parla.
L’agricultori chì anu fattu manghjà tanta ghjente ne
sò custretti, a sera, à fàssi un brodu cù i soli legumi
di l’urticellu chì li ferma sempre, puru si a terra
s’avvicina pian’ pianinu di i so’ spini è i so’ capi
zembi. S’ellu ci vole à mandà i figlioli à fà studii
in le grande scole francese, ùn ne parlemu ; trà i
viaghji, a cameruccia, e carighe, u « resto U », ci
passa a ritirata sana ! Furtuna ch’ella ci hè l’università
di Corti, ben chì tutte e discipline ùn ci
siinu ; ma, for’di u mare à francà, l’affare ghjè listessa.
Avà, dicenu chì i pasti servuti in Corsica da i « resto
di u core », quist’annu, sò in crescita di vinti per
centu raportu à annu passatu ! I stroppii è tribulati
di natura o d’accidente ùn anu chè 620 euri per
mese ; ma chì vulete fà cun quessa a limosina ?
Accantu à ste miserie, certi facenu prufitti di più in
più strasordinarii : casali magnifichi cun tuttu u
benistà è u più grande lussu, vitture chì parenu
treni, battelli tale palazzi cun piscine, jet schi, eliccotteri,
persunale di prima trinca, sceltu è zelatu,
cucinari, cameriere è ancu… postu ch’elli ne ricercanu,
- l’aghju intesa spessu nantu à l’onde d’
R.C.F.M - « des valets ! » iè, cum’è in li tempi di
i rè ! Eo, sin’ad avà, pensavu chì u « valet » era
una fiura di carte da ghjucà à brisca, à scopa o puru
à « belotte » quandu, pichjendu nantu à u tavulinu
di carta « d’atout » si dice : valettu ! eh bè avà,
rivenimu à quelli tempi di i « valets » ! Quessa a
parulla mi pare propiu avvilente.
Ma sentite què ; pocu fà, aghju intesu una bastiaccia
carca à soldi è à cunneria, parlà di i so’ « domestiques
» l’accertu ! ghjè verità ! Per mè, issu termine
ùn s’impieca chè per l’animali mansi, di casa ;
custì dinù…mancu a vergogna !
Eccu avà à ciò chè no’ ne simu quì, in Corsica di
l’anni 2000. Sta Corsica chì tutt’ognunu è sopratuttu
i furesteri, dicenu ch’ellu hè u più bellu paese
di u mondu ! Tutti si volenu installà quì ; da l’ecologistu
Nicolas Hulot chì campa pè e nostre muntagne
à tant’altri menu nucenti chì si volenu manghjà
mondu è mari cun soldi à buzzeffu venuti d’altrò,
da cumpràssi e nostre case, i nostri più belli terreni,
i nostri più belli siti, d’anessàssi e nostre acque da
fà ùn sò quanti terreni di golfu à 18 tufoni, di serrà
tutti l’accessi à e nostre piaghje di piglià pussessu
di e nostre marine, di e nostre calelle è di i nostri
golfi da creà centinaie di piazze per tutti ‘ssi battelli
carchi di furesteri è di roba da impuzzichisce e nostre
sponde guerdendu spessu a Corsica da luntanu.
Eppuru, duveriamu esse i più ricchi di a pianetta,
quelli à u P.I.B. più maiò da tante ricchezze naturale
ch’omu hà !!
A prova si n’hè… avemu à rivoccu è per l’eternu u
sole è l’acqua di u celu è di i fiumi ; quella chì, in
breve, valerà più chè u petrogliu ! A dicu franca :
o Corsi, siate attenti ! tutte ste ricchezze fàcenu
vene e sanne longhe à una mansa di gruppi, trusti è
altri « lobbies » ; i quali, cum’è i turchi è i barbareschi
di tandu, venenu sempre da mare in là, ma
sta volta, cun l’accunsentu è l’aiutu di i grandi puliticanti
francesi chì ci assupraneghjanu ma dinù è
quessa ghjè peghju, neguziatu da l’interessu, di
certi nostri « valetti » manghjoni, chì, tale tanti
cavalli di Troie, sò innu a piazza chè un pezzu, per
vende è fà vende à tradimentu, a nostra terra…
vendendu à tempu e so’ anime.
stu 25 di marzu 2008 ghjornu di l’Annunziata
